Alambique convida a les persones que recibieron reclamaciones, tán pagando o yá devolvieron el dineru a participar nel alcuentru del martes 27 d’ochobre, a les 18:00, na cai Peña Santa de Enol, númberu 4, baxu.
¿Cómo reclamar los nuesos drechos cuando una prestación destinada a garantizar la subsistencia acaba convertida nuna delda? Esa ye la cuestión qu’Alambique quier abordar na reunión que convoca esti martes en Xixón. La convocatoria diríxese tanto a quienes tienen reclamaciones pendientes del salariu social o del Ingresu Mínimu Vital como a quienes tán devolviendo les cantidaes reclamaes o yá terminaron de pagales.
L’alcuentru llega nun momentu decisivu, dempués de la reforma llegal que permite revisar determinaes deldes del salariu social y solicitar la devolución de dineru yá reintegráu. Pero conocer esa posibilidá y poder exercela nun son lo mesmo: la falta d’información, los trámites y la dificultá pa entender les resoluciones siguen siendo obstáculos pa les persones afectaes.
El conflictu vien de llueñe. Los retrasos na revisión de los espedientes y la descoordinación ente prestaciones provocaron situaciones nes qu’una persona comunicaba un cambéu —entamar a trabayar, cobrar el IMV o modificar la composición del llar— y siguía recibiendo pagos. Meses o años dempués llegaba la reclamación. El problema de les ayudes que terminen convirtiéndose nuna trampa de deldes afecta a families con mui poca capacidá pa facer frente a devoluciones inesperaes.
Alambique lleva tiempu denunciando que se treslladen a les persones emprobecíes les consecuencies de la mala xestión alministrativa. Cola campaña «Rompamos la cadena de la deuda», el colectivu y les persones afectaes reclamaron paralizar los cobros nos casos nos que se comunicaron los cambios y persistía la vulnerabilidá. Tamién desixieron información y atención suficientes pa poder defender los sos drechos.
La Llei 6/2026 abre una vía de reparación cuando la persona comunicó los cambios de forma veraz y nel plazu establecíu, el pagu indebíu derivó de retrasos o errores alministrativos y nun hubo fraude nin mala fe. Nos supuestos previstos, permite dexar ensin efectu deldes pendientes y recuperar cantidaes yá pagaes. Nun supón, sicasí, una cancelación xeneral de cualquier reclamación.
Nel so balance de la reforma, Alambique valoró l’avance como un resultáu de la movilización, pero amosó preocupación pola capacidá de la Conseyería pa tramitar les revisiones. El retu agora ye que les persones afectaes puedan exercer efectivamente los drechos reconocíos.
La información sobre cómo reclamar les devoluciones del salariu social recueye les principales posibilidaes del procedimientu. Pa solicitar la devolución de cantidaes yá reintegraes, la llei establez un añu dende la so entrada en vigor, el 29 de setiembre de 2026, coles condiciones y llendes previstes na norma. La reforma asturiana nun anula les deldes que reclame l’INSS pol IMV, que requieren una vía distinta.
La reunión del martes busca facilitar esa información y la defensa colectiva frente a les reclamaciones. La cita ye’l 27 d’ochobre, a les 18:00, na cai Peña Santa de Enol, númberu 4, baxu, en Xixón, y ta abierta tamién a quienes yá pagaron la delda.
This work is licensed under a Creative Commons Attribution 4.0 International License.
