Los actos d’exaltación militar y nacionalista española nos centros educativos merecen un alderique públicu nel contestu de les agresiones y menacies facistes denunciaes n’Asturies. Los antecedentes amuesen una disputa de fondu sobre la educación: formar persones con pensamientu críticu o fomentar l’adhesión a símbolos y estructures d’autoridá.

La noticia sobre un izáu de bandera nel colexu Santo Ángel de la Guarda d’Uviéu vuelve poner enriba la mesa la presencia del nacionalismu español nos espacios educativos. L’alderique tresciende una ceremonia concreta: afecta al papel de la escuela nun momentu nel que les proclames autoritaries y los discursos d’odiu conviven con episodios de violencia contra militantes sociales, persones LXTBI y colectivos que defenden drechos.

Los izaos, les xures de bandera y les exhibiciones militares son actos distintos, pero la so incorporación a la vida escolar plantega una mesma entruga: qué finalidá educativa cumple convertir l’adhesión patriótica españolista y la escenificación de l’autoridá militar nuna actividá pa menores.

La cuestión tien antecedentes n’Asturies. En xunu de 2023, cincu docentes del IES Númberu 5 d’Avilés protestaron formalmente contra la presencia de les Fuercies Armaes nel centru. La denuncia incluyía un izáu de bandera y charres sobre salides profesionales nel exércitu que, según los profesores, se desenvolvieren al marxe de la programación xeneral. Los docentes cuestionaben que la dirección dedicara esfuerzos a una ceremonia castrense mientres la educación afrontaba retos como la salú mental, el cambiu climáticu o la formación cultural.

n’avientu de 2025, les denuncies sobre la militarización de la educación pública recoyíen l’esmolecimientu de la Coordinadora Asturiana de ONGD y d’Andecha Astur pola presencia d’actividaes militares nes aules. La coordinadora cuestionaba la promoción del militarismu nun contestu de conflictos armaos; Andecha señalaba, amás, un procesu d’españolización de la educación venceyáu a valores d’obediencia y subordinación. Son denuncies reiter aes que reclamen una respuesta educativa y política.

La rellación col puxu de la estrema drecha tien d’analizase nel terrén de la normalización cultural. La exaltación de la “patria” y la presentación de la disciplina militar como modelu social ofrecen un marcu que los discursos autoritarios pueden remanar. 

Esi alderique algama una gravedá especial cuando se mira lo que ta pasando nes cais. Nel casu de la agresión de San Matéu contra dos militantes d’AMA Asturies, la Policía comunicó indicadores d’una posible motivación homófoba y proclames venceyaes a la ultradrecha.

A primeros d’ochobre, los participantes n’acampada pola vivienda de La Escandalera denunciaron otra agresión. Según el so rellatu, un grupu presentóse con insultos, glayios d’arribaspaña y saludos nazis enantes de qu’un participante recibiera un puñetazu. 

Estos fechos obliguen a discutir qué valores reciben reconocencia institucional y qué espaciu se reserva al pacifismu, a la diversidá nacional y a la discrepancia. N’Asturies, esa reflexión inclúi’l reconocimientu de la llingua, la cultura y la identidá propies. Presentar la identidá española como natural y ayena a la ideoloxía, mientres se cuestiona la presencia de l’asturiana, introduz una peligrosa desigualdá de fondu.

Frente al puxu de la estrema drecha y del facismu, la escuela tien una responsabilidá concreta: enseñar a detectar la propaganda, defender los drechos humanos y resolver los conflictos ensin violencia. Les alministraciones y les direcciones escolares tienen que responder qué aporten les ceremonies patriótiques y militares a esi cometíu. 

This work is licensed under a Creative Commons Attribution 4.0 International License.