El conceyu pon a disposición de los pequeños productores maquinaria y espacios que difícilmente podríen asumir de manera individual, recuperando una idega fondamente enraigonada na tradición rural asturiana: compartir recursos y collaborar pa facer viable lo que, por separao, resultaría más difícil o a cencielles imposible.

Pesoz vien d’estrenar la primer bodega comunitaria pública d’Asturies, integrada nel Centro Enolóxicu de Pezós y L’Agüeira (CEPA) y preparada pa que pequeños viticultores puedan ellaborar les sos producciones cumpliendo los requisitos de la DOP Cangas. La instalación busca facilitar tanto la continuidá de quienes yá producen vinu como la incorporación de nuevos proyectos, reduciendo una de les principales barreres d’entrada al sector: el costu de disponer individualmente de bodega, maquinaria y equipamientu.

La iniciativa tien un interés especial nun conceyu onde alredor d’una ventena de vecinos siguen ellaborando vinu artesanalmente y onde acaba de constituyise una asociación que reúne a unos catorce pequeños productores. De momentu, trés productores tán yá incorporaos al proyectu. La inversión global na bodega comunitaria ronda los 150.000 euros, procedentes de la Dirección Xeneral de Retu Demográficu.

Pero’l valor del proyectu va más allá del vinu. En zones rurales con poca población, la propiedá o l’usu compartíu de maquinaria, obradores, talleres y otres infracadarmes puede ser una de les fórmules más eficaces pa aumentar el nivel de vida y crear actividá económica. Nun fai falta que cada productor tenga una instalación completa que va utilizar unes selmanes al añu: puede haber una común, profesional y bien equipada, utilizada por munches persones.

La bodega de Pesoz nun ye una andecha nel sentíu históricu estrictu, pero recupera parte de la filosofía d’organizar la economía de la comunidá compartiendo enfotu, tiempu y recursos y adáptala al sieglu XXI: propiedá pública, usu colectivu, medios modernos y posibilidá de crear actividá económica particular a partir d’una infracadarma compartida.

Esti tipu de modelos, que’n so momentu foron avezaos pa la ellaboración de sidre en llagares comuñales, podría tener aplicación n’otros ámbitos: maquinaria agrícola, obradores alimentarios, cámares frigorífiques, espacios de tresformación, vehículos o equipamientos que resulten  caros pa una sola familia pero perfechamente asumibles de manera comunitaria. Nun mediu rural onde la rentabilidá de munches actividaes depende precisamente de controlar los costes, compartir puede significar la diferencia ente abandonar una producción o convertila nuna pequeña actividá económica.

 Pesoz  forma parte oficialmente de la zona de producción de la DOP Cangas, xunto con Cangas, Ayande, Degaña, Grandas de Salime, Ibias, Eilaoy determinaes parroquies de Tinéu. La denominación protexe una viticultura especialmente singular, amparando vinos tintos y blancos. Son vinos de perfil atlánticu y viticultura de montaña, caracterizaos pola frescura y l’equilibriu ente alcohol y acidez.

La nueva bodega comunitaria permite agora que Pesoz nun se llende a conservar la memoria d’esi pasáu vitivinícola, sinón que pueda volver convertilu nuna actividá económica real. Y equí ta posiblemente la parte más importante del proyectu: demostrar que recuperar formes comunitaries de trabayu nun significa volver atrás, sinón utilizar una tradición útil pa construyir un mediu rural con más autonomía, menos costes y más posibilidaes de futuru.