El IPC asturianu algamó en agostu’l 3,9% interañal, la tasa más alta dende 2023. La medría supera les xubíes salariales pactaes na mayoría de los convenios, el 3,1% aplicáu al salariu mínimu y, con más diferencia entá, l’incrementu de les retribuciones públiques. La resultancia ye una nueva presión sobre’l poder adquisitivu de les families, especialmente visible na vivienda, la enerxía, los carburantes y la cesta de la compra.
La inflación volvió acelerar n’Asturies. Los precios aumentaron un 3,9% respecto a agostu del añu pasáu, ocho décimes más que nel mes anterior. Los alimentos y bébores non alcohóliques intensificaron igualmente la so subida hasta’l 2,4%, mientres vivienda y transporte figuren ente los componentes que más puxen de la escalada.
Nun ye namás que les coses cuesten más, ye que los ingresos de les persones nun medren al mesmu ritmu y la comparanza entama a dibuxar una perda de poder adquisitivu pa una parte importante de la población.
Los salarios pactaos nos convenios colectivos aumentaron nel estáu una media del 3,54% nel conxuntu estatal, pero n’Asturies la evolución salarial ye particularmente moderada. Un analís de los convenios rexistraos hasta xunu situaba la medría salarial media asturiana nel 3,01%. Nos convenios sectoriales y d’empresa, les xubíes asturianes movíense mayoritariamente alredor del 2,8%-2,9%, mui perbaxo la media estatal y un puntu enteru menos que la inflacción.
El Salariu Mínimu Interprofesional subió esti añu un 3,1%, hasta los 1.221 euros mensuales en catorce pagues. Frente a un IPC asturianu del 3,9%, la diferencia provisional ye de ocho décimes.
Entá mayor ye la distancia pal personal públicu: la xubida xeneral prevista pa 2026 ye del 1,5%, cola posibilidá d’un 0,5% adicional si se cumple la condición venceyada al IPC. Inclusive cola compensación posterior, la evolución queda perbaxo del aumentu actual de los precios.
Esta situación suma presión a un mercáu llaboral nel que’l problema nun ye namás tener o nun tener emplegu. Al menos una de cada cuatro persones que trabaya n’Asturies busca otru emplegu y que les hores extra non pagaes suponen millones d’euros que nunca lleguen a los bolsos de los trabayadores: unes 56.000 hores selmanales nin se paguen nin se compensen.
La paradoxa ye sencilla. El salariu nominal puede subir y, al mesmu tiempu, permitir comprar menos. Una persona que cobre un 3% más pero tenga qu’afrontar precios un 3,9% superiores pierde poder adquisitivu real.
La vivienda ye’l casu más evidente. Pa la población moza, una persona d’ente 25 y 34 años pue tener que dedicar cerca de la metá del salariu brutu al alquiler. La consecuencia ye que trabayar yá nun garantiza independizase. De la mesma manera, la extensión de les zones de mercáu residencial tensionáu n’Asturies evidencia que’l problema de los precios residenciales yá nun ye una escepción llocal y que’l turismu y la llegada de teletrabayadores de zones más riques d’Europa tan afeutando’l mercáu de la vivienda.
A esti panorama súmase una estructura productiva que tampoco garantiza salarios altos y estables. La economía asturiana perdió 7.300 emplegos industriales nun añu, mientres gana pesu l’emplegu en sectores de servicios con mayor presencia de temporalidá, parcialidá y retribuciones baxes.
This work is licensed under a Creative Commons Attribution 4.0 International License.
