Una cadarma parcial afayáu nos cantiles de Vega ye’l primer rexistru inequívocu de Ichthyosaurus anningae fuera del Reinu Xuníu y l’exemplar de mayor tamañu conocíu. L’estudiu, con participación del MUJA y equipos d’Arxentina y Estaos Xuníos, confirma una vegada más el valor científicu internacional del padremuñu paleontolóxicu asturianu.

Los cantiles de Vega, en Ribeseya, guardaron durante unos 192 millones d’años los restos d’un reptil marín que güei permite ampliar el mapa conocíu de la fauna del Xurásicu européu. Un equipu internacional d’investigadores confirmó que la cadarma parcial recuperáu na zona pertenez a Ichthyosaurus anningae, una especie que hasta agora namás se conocía con seguridá nel Reinu Xuníu. Ye, amás, l’exemplar de mayor tamañu identificáu de la especie hasta’l momentu.

Los primeros restos apaecieron en 2009, cuando José Antonio Sánchez Féliz llocalizó los güesos nos cantiles al este de la playa de Vega. El descubrimientu nun tuvo una identificación inmediata. Los restos del craniu de los ictiosaurios son especialmente delicaos y el procesu de preparación nel llaboratoriu foi llargu, hasta permitir estudiar con detalle un conxuntu nel que se conserven güesos craneales —dalgunos tridimensionales—, dentame, parte de l’aleta izquierda, costielles y vértebres cervicales, dorsales y caudales.

La investigación vien d’espublizase na revista internacional Acta Palaeontologica Polonica y ta firmada por Marta S. Fernández y Lisandro Campos, del CONICET y Muséu de La Plata, n’Arxentina; Judy A. Massare, del Rochester Institute of Vertebrate Paleontology, n’Estaos Xuníos; y Laura Piñuela, Ángel García-Pérez y José Carlos García-Ramos, del Muséu del Xurásicu d’Asturies. El trabayu suma asina un nuevu exemplu de la capacidá del padremuñu asturianu pa xenerar investigación científica con proyeición internacional.

La roca na que quedaron atrapaos los restos ye una marga escuro perteneciente a la Formación Rodiles, del Xurásicu Inferior. L’estudiu de los amonites presentes nes mesmes capes permitió precisar la antigüedá del animal n’alredor de 192 millones d’años, nel Pliensbachiense, una etapa de la que’l rexistru mundial d’ictiosaurios ye relativamente escasu.

N’aquel intre una gran plataforma marina, de menos de cien metros de fondura, cubría bona parte de lo que güei ye Asturies. Nesi mar vivíen reptiles perfectamente adaptaos a la vida acuática, ente ellos ictiosaurios y plesiosaurios, munchos millones d’años primero de la configuración del paisaxe actual.

La determinación de la especie foi posible principalmente pola forma del húmeru y por distintos elementos anatómicos del craniu. La comparanza con exemplares británicos permitió identificar el fósil como Ichthyosaurus anningae y comprobar que se trataba d’un adultu d’alredor de dos metros de llargor, el mayor conocíu de la especie.

El nome anningae fai homenaxe a Mary Anning, la paleontóloga inglesa del sieglu XIX que realizó dalgunos de los descubrimientos fundamentales pa la conocencia de los reptiles marinos xurásicos. Hasta esti estudiu, los fósiles atribuyíos con seguridá a esta especie procedíen de Dorset, nel sur d’Inglaterra. L’exemplar asturianu amplía agora la so distribución conocida hasta la costa cantábrica.

El valor del estudiu va más allá d’incorporar un puntu nuevu al mapa d’una especie. N’Asturies yá se documentara otru ictiosauriu, esti procedente de los cantiles próximos a Rodiles, en Villaviciosa, y atribuyíu al xéneru Leptonectes. La comparanza ente dambos amuesa que compartíen el mesmu espaciu marín pero probablemente aprovechaben recursos distintos.

Los dientes del Ichthyosaurus anningae de Vega son más robustos, moderadamente cónicos y con ápices arredondiaos, una morfoloxía compatible con una alimentación xeneralista. Los de Leptonectes, pelo contrario, son más finos y delicados y encaxen meyor nuna dieta principalmente piscívora. Los investigadores interpreten esa diferencia como una señal de repartición de nichos ecolóxicos ente distintos ictiosaurios, un patrón asemeyáu al observáu nos xacimientos del suroeste d’Inglaterra.

Eso permite debuxar un mar asturianu del Xurásicu Inferior considerablemente más complexu de lo que podría paecer. Fai 192 millones d’años convivíen equí, polo menos, dos xéneros distintos d’ictiosaurios y plesiosaurios. Los restos recuperaos n’Asturies figuren, amás, ente los esqueletos de reptiles marinos xurásicos más completos documentaos na Península Ibérica.

El nuevu estudiu refuercia la importancia d’una costa que lleva décades apurriendo fósiles de relevancia internacional. Nun se trata solamente de güelgues de dinosaurios o d’un patrimoniu capaz d’atrayer visitantes al MUJA: les roques del llitoral asturianu son un auténticu archivu de la evolución de los ecosistemes terrestres y marinos del Mesozoicu.

Esti afayamientu súmase a otros descubrimientos que siguen poniendo de manifiestu’l potencial del oriente del país, onde la protección y estudiu del patrimoniu —dende afayamientos arqueolóxicos escepcionales hasta los xacimientos paleontolóxicos— permite incorporar información nueva al conocimientu científicu internacional.

La relevancia d’estes investigaciones fai tamién especialmente importante la divulgación. La ciencia producida n’Asturies nun tien por qué quedar acutada a les publicaciones académiques: iniciatives de divulgación científica n’asturianu permiten que’l conocimientu científicu forme parte tamién de la cultura propia del país.

L’Ichthyosaurus anningae de Vega permaneció millones d’años dientro de la roca y otros diecisiete dende’l so descubrimientu hasta poder conocer con precisión qué yera. Agora sabemos que nun ye un fósil más: ye’l primer exemplar inequívocu de la so especie identificáu fuera del Reinu Xuníu y una nueva pieza pa entender cómo yeren los mares europeos del Xurásicu Inferior.

El descubrimiento vuelve poner el focu sobre una riqueza que forma parte del padremuñu natural asturianu y que precisa investigación, conservación y divulgación continuada. Igual que sucede col patrimoniu cultural amenaciáu, conocer lo que tenemos ye’l primer pasu imprescindible pa poder conservalo.