Luis Laria anuncia’l pieslle indefiníu del centru de La Mata a partir del 27 de setiembre, fartucu de lo que considera falta de reconocencia y promoción institucional d’un proyeutu que lleva décades construyendo ensin subvenciones públiques pal so caltenimientu

El Parque de la Vida va pesllar les sos puertes el próximu 27 de setiembre y nun hai, de momentu, fecha de reapertura. El so fundador y director, Luis Laria, anuncia un parón indefiníu pa decidir si tien xacíu siguir al frente d’un proyeutu al que dedicó bona parte de la so vida. Nun fala de falta de visitantes —el centru vien de rexistrar un nuevu récord y siguen llegando peticiones de colexos— nin reclama una subvención que garantice la so supervivencia. La razón que da ye otra: el cansanciu acumuláu tres años de lo que define como «despreciu alministrativu», falta de consideranza y ausencia d’una promoción institucional acorde cola actividá que se desarrolla en La Mata. Si la decisión acaba siendo definitiva, Asturies va perder al mesmu tiempu un equipamientu museísticu singular, un recursu educativu utilizáu por miles d’escolares y una atracción capaz d’atraer visitantes al occidente.

Luis Laria nun ye un empresariu que decidiera un día abrir un muséu temáticu. Hosteleru de profesión y naturalista por vocación, en 1996 fundó en L.luarca la Coordinadora pal Estudiu y Protección de les Especies Marines, CEPESMA, una organización que durante trés décades desarrolló una intensa actividá de recuperación de fauna, educación ambiental y divulgación científica. Pela so rede pasaron foques, tortugues, aves, cetáceos y otros animales salvaes, y el nome de Laria acabó teniendo repercusión internacional pola colección de calamares xigantes que CEPESMA consiguió reunir, la mayor del mundu nel so momentu, con exemplares que llegaron inclusive al Smithsonian de Washington. Anguaño, la organización sigue desenvolviendo actividaes educatives que, según calculaba esti mesmu añu, algamaríen alredor de 8.000 neños y neñes a lo llargo del cursu.

El Parque de la Vida ye la continuación y, en bona midida, la culminación d’esi trabayu. El proyectu empezó nuna finca de La Mata que, como’l propiu Laria recordaba nuna entrevista concedida a InfoAsturies en 2017, yera cuando la mercó «una planicie ensin árboles». Él foi tresformándola pali que pali, plantando miles d’exemplares y incorporando instalaciones, colecciones y espacios divulgativos. Una investigación botánica de la Universidá d’Uviéu confirmó años dempués que, salvo dos árboles, tolos exemplares estudiaos nel Parque fueran plantaos o tresplantaos nes dos décades anteriores. Lo que fuere un ermu convirtióse nun espaciu natural recorrible, con miles d’árboles, arbustos y plantes, sendes temátiques ya instalaciones museístiques.

Nun foi una infraestructura construyida por una alministración y entregada depués a un xestor. Foi un proyeutu que foi creciendo cola implicación personal de Laria, los sos recursos, el trabayu d’un equipu y una rede amplia de collaboraciones científiques y donaciones. Yá en 2008 la prensa describía’l Parque como’l so gran proyectu personal y señalaba que-y dedicaba bona parte del so esfuerciu y de la so economía. Años más tarde, el propiu Laria resumía a InfoAsturies la situación con claridá: el Parque nun recibía subvenciones pal so caltenimientu y sobrevivía coles visites y con un enorme esfuerciu personal.

El resultáu ye un equipamientu difícil d’encaxar nuna sola categoría. El Parque dispón  de 750 metros cuadraos d’esposiciones interiores y d’un percorríu exterior de más de kilómetru y mediu nun entornu natural. Les sos sales pasen pela formación de la Tierra, la evolución de la vida y del ser humanu, la fauna marina, los cetáceos, los cefalópodos, la xeoloxía, l’astronomía y l’astronáutica. Nel mesmu llugar conviven ciencia, educación ambiental, patrimoniu natural, historia científica y recuperación de fauna.

En La Mata puede entrase nuna estructura real del fuselaxe d’un cohete européu Ariane 5, donada por Airbus, xunto con otros equipamientos aeroespaciales. El Parque conserva tamién un traxe real del cosmonauta rusu Yury Usachov, material d’investigación que viaxó al espaciu y un planetariu con una cúpula de 11,5 metros de diámetru y nueve metros d’altura. A ello súmase un observatoriu de trés plantes dende’l que pueden contemplase’l Sol y les sos manches o protuberancies durante’l día y la Lluna, planetes, estrelles o nebuloses pela nueche.

La xeoloxía ocupa otru de los espacios más singulares. El Parque conserva decenes de tonelaes de fósiles de la etapa Estefaniense, l’últimu periodu del Carboníferu, con materiales de más de 300 millones d’años procedentes en bona parte del patrimoniu mineru. Laria cifraba esti añu la nueva esposición en más de 60 tonelaes de fósiles y presentábala como una colección única pola so dimensión. El centru dedica amás un espaciu destacáu a dos figures científiques inseparables de Valdés y de la ciencia asturiana, Severo Ochoa y Margarita Salas, integrando la so memoria nuna propuesta que nun presenta la ciencia como daqué alloñao, sinón como parte del territoriu.

Pero’l valir del Parque nun ta namás no que guarda. Ta nel usu que se fai d’ello. La so función principal foi convirtiéndose progresivamente na educación y la divulgación. Los grupos escolares recorren les instalaciones, entren nel Ariane 5, ven fósiles de cientos de millones d’años, pasen pel planetariu, conocen la obra d’Ochoa y Salas y participen en talleres nos que la ciencia s’entemez cola educación ambiental y emocional. Dende la pandemia, el Parque desarrolla amás actividaes de xestión del mieu, utilizando’l contactu controláu con animales como culiebres pa trabayar fobies y reflexonar sobre cómo se formen y se superen los mieos.

Esa función educativa trespasó hai tiempu les fronteres asturianes. Yá en 2017 Laria afirmaba que cuasi la metá de los colexos que visitaben el Parque llegaben de Galicia, nuna dómina na que llegaron a tener reserves escolares con años d’antelación. Nun se trata, por tanto, d’un pequeñu recursu llocal ensin proyeición. El Parque convirtióse nun destín educativu capaz d’atraer grupos d’otros territorios y, con ellos, families y visitantes que dempués vuelven a la zona. En 2026, cuando Laria tomó la decisión de parar, siguíen entrando llamaes de centros escolares y el Parque acababa de superar el so propiu récord de visites.

A esa dimensión museística y educativa hai que sumar la turística. Un visitante que se desplaza hasta La Mata nun entra y sal simplemente d’un muséu: llega a Valdés, consume na comarca y tien la oportunidá de conocer L.luarca y otros recursos del occidente. El propiu portal turísticu municipal presenta’l Parque como un equipamientu con fósiles, planetariu, observatoriu, divulgación científica y recuperación animal. La contradicción que denuncia Laria ye precisamente esa: tener un recursu capaz de mover persones y economía ensin que, al so entender, les instituciones responsables de promocionar el territoriu lu valoren y difundan como correspuende.

Laria insiste en que nun ta pidiendo perres. Nel comunicáu que precedió al anunciu del pieslle foi esplícitu al dixebrar la so decisión de cualquier reclamación de subvenciones o ayudes económiques. Lo que denuncia ye falta de consideranza y promoción. Y hai un componente personal que nun puede separase del conflictu: dempués de décades poniendo tiempu, recursos y enerxía nun proyectu que depende en gran midida de la so persona, diz que llegó’l momentu de pensar tamién na so propia vida y na xente que lleva años ayudándolu.

Esi cansanciu ye probablemente la consecuencia más grave de la situación. Les instituciones nun construyeron el Parque de la Vida, nun asumieron el so caltenimientu nin crearon dende cero la rede de conocencies, colecciones y collaboraciones que lu fixeron medrar. Eso fíxolo principalmente Laria, acompañáu por collaboradores, científicos, voluntarios y visitantes. Pero dempués de décades de trabayu, la falta de reconocencia que denuncia acabó gastando precisamente’l recursu más difícil de sustituir: l’enfotu de la persona que lu creó.

Asturies queda asina, polo menos temporalmente, ensin muncho más qu’un muséu. Pierde un centru onde la reciella podía tocar la ciencia en vez de vela nun llibru; un espaciu onde colexos d’Asturies y de fuera veníen a deprender sobre la vida, l’universu y la naturaleza; un centru que siguía atendiendo animales cuando se-y reclamaba; y una atracción turística singular nel occidente. Y corre’l riesgu de perder tamién un patrimoniu material difícil de recuperar: Laria yá anunció que, si’l pieslle acaba siendo definitivu, les pieces y equipamientos podrán ser donaos, cedíos o compartíos con museos nacionales o internacionales pa que sigan teniendo una función científica y divulgativa.

Nun sería la primera vegada que Laria tien que ver cómo un patrimoniu que contribuyó a crear acaba dependiendo d’otros pa sobrevivir. La colección de calamares xigantes de CEPESMA, que llegó a ser la mayor del mundu, pasó años marcada polos daños y l’abandonu del antiguu muséu de L.luarca antes de quedar finalmente en manes municipales. Agora’l riesgu afecta a una obra entá mayor y más diversa.

El Parque de la Vida nació onde nun había árboles y acabó reuniendo naturaleza, ciencia, astronomía, paleontoloxía, educación, recuperación animal y miles de visitantes. Convertir una planicie vacía nun equipamientu d’esta dimensión llevó décades. Dexar que desapareza puede llevar namás unos meses.

Si’l 27 de setiembre ye finalmente’l principiu del final, lo que va perder Asturies nun va poder midise namás en metros cuadraos, númberu de pieces o visites escolares. Va perder el resultáu de décades d’iniciativa, trabayu y compromisu personal que les instituciones nun tuvieron que crear nin pagar y que, sicasí, tampoco fueron capaces —según denuncia quien lo sostuvo durante tola so vida— de facer sentir valoráu.

This work is licensed under a Creative Commons Attribution 4.0 International License.