La Universidá d’Uviéu supera los 18.000 estudiantes y estrena matrícula de baldre ensin condiciones económiques, pero’l rector alerta de que l’accesu al aloxamientu pue convertise nuna nueva barrera económica.
La llegada de centros universitarios privaos amenaza con añadir presión a un mercáu onde los estudiantes asturianos compiten con una demanda de mayor poder adquisitivu
La Universidá d’Uviéu entama’l cursu 2026-2027 con más de 18.000 estudiantes matriculaos, consolidando una evolución que contrasta cola perda continuada d’escolinos nes etapes d’Infantil y Primaria. Pero esti xorrecimientu llega acompañáu d’un problema que puede acabar anulando parte de les polítiques diseñaes precisamente pa facilitar l’accesu a los estudios: la vivienda.
El rector, Ignacio Villaverde, ponía esta selmana l’alerta. Cola matrícula universitaria de baldre yá implantada, el coste académicu dexa de ser una de les principales barreres d’entrada, pero’l preciu d’una habitación o d’un pisu puede ocupar el so llugar. Villaverde advirtió de que la vivienda amenaza con convertise nuna nueva dificultá pa poder estudiar y reclamó al Principáu un plan d’inversiones a diez años pa la Universidá.
La paradoxa ye evidente. El Gobiernu asturianu calcula que la matrícula de baldre puede beneficiar a más de 20.000 estudiantes, con un aforru mediu estimáu de 732 euros por cursu, asumiendo los presupuestos autonómicos la compensación económica a la Universidá d’Uviéu y ampliando esa gratuidá a los estudiantes que los sos ingresos seyan superiores a los contemplaos nes beques MEC.
732 euros representen menos d’un mes de vivienda pa un estudiante que tea de desplazase lloñe de la so llocalidá pa estudiar.
Per otru llau, la incompatibilidá de recibir l’ayuda asturiana cola otorgada pol Ministeriu d’Educación y Ciencia garantiza que’l pagu de la universidá de baldre va dir integramente a estudiantes de families con ingresos perriba la llende, que podrán dedicar les sos perres a alquileres mientres que los que menos tienen seguirán nes mesmes condiciones de matrícula que fasta agora pero enfrentándose a costes inasumibles de vivienda, devolviendo’l desequilibriu nel accesu a la Universidá d’Uviéu al so puntu de partida.
Pa completar el panorama, la fuerte crisis de vivienda que ta careciendo Asturies va sumase agora la demanda d’aloxamientu de los estudiantes de los nuevos proyectos universitarios privaos n’Uviéu, Avilés y Xixón.
El más avanzáu ye’l centru de la Universidad Alfonso X el Sabio (UAX) n’Uviéu, que anunció l’entamu de l’actividá nel cursu 2026-2027 con unos 250 estudiantes de Medicina y Enfermería. El proyectu nun queda ehí: la previsión empresarial ye llegar a unos 2.000 alumnos en cinco años, captando tamién estudiantes procedentes d’otros países..
Nun se trata d’universidaes privaes asturianes nueves en sentíu estrictu, sinón de centros adscritos a instituciones privaes con sede fuera d’Asturies, que yá tán en marcha y que van incorporar progresivamente miles de estudiantes a les trés grandes ciudaes asturianes y esos estudiantes necesiten vivir en dalgún sitiu.
Falamos de centros privaos nos que se paga 10.000, 20.000 ya inclusive 25.000 euros por cursu, dependiendo de la titulación. Nel proyectu de la Universidá Europea pa Xixón, por exemplu, les tarifes de referencia de los mesmos estudios nos sos otros campus sitúen Medicina perriba de los 25.000 euros nel primer añu, Odontoloxía alredor de los 23.000 y Farmacia cerca de los 14.000, lo qu’implica que la demanda potencial que xeneren estos centros parte d’un perfil económicu diferente y nun mercáu escasu les consecuencies del xorrecimientu esponencial del númberu de demandantes dispuestos a pagar más son llacerioses.
El Principáu invierte millones d’euros n’eliminar la matrícula pa garantizar que la renta familiar nun determine quién puede estudiar na Universidá d’Uviéu. Pero si un estudiante de Cangas del Narcea, Tapia, Llanes o L.lena nun puede pagar una habitación n’Uviéu o Xixón, la gratuidá académica de poco-y sirve; garantir el drechu a estudiar nun consiste namás en poner a cero’l recibu de matrícula.
This work is licensed under a Creative Commons Attribution 4.0 International License.
