La Conseyería confirma que continúa’l descensu del númberu de matricules, pero evita apurrir datos concretos. La serie de los últimos cursos amuesa una perda de casi 5.000 escolinos, con un impactu especialmente fuerte n’Infantil y Primaria
El primer díi de clas ye tradicionalmente’l momentu d’evaluar la evolución demográfica al traviés de los datos d’escolarización; sicasí, esti añu la Conseyería d’Educación, seique confirma que continúa’l descensu del númberu d’escolinos n’Asturies, pero ensin concretar la magnitú d’esi descensu.

El primer díi de clase del cursu 2026-2027 llega ensin que’l Gobiernu asturianu apurra una cifra concreta de matrícula, lo que torga valorar la dimensión exacta de la nueva baxada; pero una güeyada a los últimos años dexa poco espaciu pa la dulda: Asturies lleva varios cursos perdiendo alumnáu de manera continuada y la cayida concéntrase especialmente nes etapes más baxes del sistema educativu, un descensu que confirma el pelligru demográficu d’una Asturies que queda ensin reciella, ensin mocedá y poro, ensin futuru.

Nel cursu 2021-2022 había 103.695 estudiantes matriculaos n’Infantil de 3 a 6 años, Primaria, ESO y Bachilleratu. En 2022-2023 baxaron a 102.666; un añu depués quedaron en 101.575; nel 2024-2025 fueron 99.906 y nel cursu pasáu, 2025-2026, la cifra volvió amenorgar hasta los 98.719 escolinos

Son casi 5.000 escolinos menos en cuatro cursos, ensin contabilizar los perdíos esti cursu, una perda próxima al 5% que nun tuvo dengún añu de recuperación nel periodu.

La cuestión nun ye namás cuántos estudiantes desaparecen del sistema, sinón onde ta produciendose la baxada. Infantil y Primaria son les etapes onde’l retrocesu demográficu se percibe con más claridá.

Nel cursu 2022-2023 sumaben 59.879 alumnos. Un añu depués baxaron a 57.804; nel 2024-2025 quedaron en 56.263 y nel pasáu cursu la cifra yera yá de 55.625.

Más de 4.200 escolinos menos en trés cursos.

ESO y Bachilleratu, pela contra, tuvieron una evolución muncho más estable. Pasaron de 42.787 matriculaos en 2022-2023 a 43.771 al añu siguiente, 43.643 nel 2024-2025 y 43.094 nel últimu cursu.

La diferencia ente unes etapes y otres espeya la evolución demográfica asturiana: les xeneraciones que tán entrando agora nel sistema educativu son más pequeñes que les que tán llegando a Secundaria.

La mengua, por tanto, nun quedó atrás. Ta avanzando dende Infantil y Primaria y va treslladándose progresivamente al restu del sistema.

La perda d’escolinos yá tien consecuencies concretes na rede educativa y nun son, comu podría deseyase, un amenorgamientu de les ratios y más presupuestu por escolín: nos caberos cuatro años y otra vuelta ensin cuntar cola necesaria información d’esti cursu que la conseyería retién, son 73 les xunidaes escolares presllaes, 50 d’infantil y 23 de primaria, que se compensen unicamente cola creación d’un colexu nel barriu xixonés de Nuevu Roces.

El Gobiernu entama’l cursu 2026-2027 ensin facer pública la cifra concreta de estudiantes matriculaos, nin un balance completu de les unidaes escolares que desapaecen o se creen. Cuando esos datos se conozan podrá midise la dimensión exacta de la baxada d’esti añu.

This work is licensed under a Creative Commons Attribution 4.0 International License.