La organización feminista Rapiegas va llevar el domingu 20 de setiembre, a les 12 hores, a la Plaza Mayor de Xixón una performance contra la prostitución que va poner el focu sobre los homes que paguen por acceder sexualmente a elles. La convocatoria llega nuna Asturies onde’l primer diagnósticu oficial sobre prostitución, esplotación sexual y trata permitió localizar más de 1.100 muyeres atendíes nun solu añu, nuna situación marcada en munchos casos pola vulnerabilidá económica y alministrativa.

La performance, entamada por Rapiegas, va celebrase tres díes enantes del Día Internacional contra la Esplotación Sexual y la Trata de Persones, que se conmemora’l 23 de setiembre. La organización plantega una acción abolicionista que busca desplazar una entruga d’avezu centrada sobre les muyeres —por qué tán na prostitución— hacia otra menos cómoda: por qué y quién paga por ello y qué demanda fai posible que’l mercáu de persones siga furrulando. Rapiegas reclama alternatives reales pa les muyeres, persecución del proxenetismu y responsabilidá pa los prostituidores.

El diagnósticu Prostitución, Esplotación Sexual y Trata con Fines d’Esplotación Sexual n’Asturies, encargáu pola Universidá d’Uviéu, l’Institutu Asturianu de la Muyer y entidaes especializaes como APRAMP, Fundación Amaranta y Médicos del Mundo, contabilizó más de 1.100 muyeres en situación de prostitución, esplotación sexual y trata que recibieron dalgún tipu d’atención n’Asturies en 2023.

El perfil que dibuxa l’estudiu oficial rompe amás cola imaxe antigua del gran club de carretera como centru del sistema prostitucional. El 68,6% de los casos detectaos localízase en pisos, frente al 29,6% en clubes. La presencia na cai ye residual, un 1,2%. Más del 90% de les muyeres llocalizaes n’entornos urbanos exercen o son atendíes en pisos.

Esa privatización dificulta la detección, el control y l’accesu de les organizaciones que trabayen coles muyeres. La propia Fiscalía vien alertando de que los pisos, xalés y viviendes particulares son escenarios especialmente difíciles d’investigar pola so volatilidá y clandestinidá. La memoria estatal de 2025 señala que nesti tipu d’espacios pueden dase condiciones más graves d’esplotación y que l’accesu policial resulta más complexu pola protección constitucional del domiciliu.

Xeográficamente, el problema concéntrase nel centru del país. Uviéu acumula’l 39% de los casos detectaos, Xixón el 28,3% y Avilés el 17,2%. Otros conceyos de la zona central y de les Cuenques sumen cerca d’otru 11%. Nel Oriente y Occidente la incidencia detectada ye menor y apaez principalmente venceyada a clubes.

La prostitución n’Asturies tien, según esi mesmu diagnósticu, un fuerte componente migratoriu. El 82,3% de les muyeres proceden d’América Llatina y el Caribe, principalmente de Colombia, Brasil y República Dominicana.

Pero’l datu probablemente más revelador ye otru: cuatro de cada diez carecen de permisu de residencia. La irregularidá alministrativa, la falta de rede familiar, la precariedá económica y les dificultaes d’accesu al mercáu llaboral conviértense asina en factores que pueden aumentar la dependencia y dificultar abandonar la prostitución.

Médicos del Mundo documentó amás que les muyeres en situación de prostitución siguen atopando barreres reales incluso pal accesu a drechos básicos como la sanidá, especialmente cuando nun pueden empadronase o acreditar el tiempu de residencia esixíu nos procedimientos alministrativos.

Esta dimensión económica y social nun pue separtase tampoco de la precariedá que sufren munches muyeres n’Asturies, nuna realidá onde tener un trabayu nin siquiera garantiza necesariamente poder vivir con dignidá y onde les situaciones de vulnerabilidá económica tienen una incidencia especialmente fuerte nos sectores feminizaos.

La Memoria de la Fiscalía Xeneral del Estáu de 2025 fai referencia espresa a unes dilixencies abiertes nel Xulgáu d’Instrucción númberu 4 d’Uviéu alredor de cinco menores vulnerables tutelaes pol Principáu, con polo menos cuatro homes investigaos por posibles delitos de favorecimientu de la prostitución de menores, agresión sexual a menor de 16 años y contra la salú pública. Son investigaciones, non condenes, pero amuesen la necesidá d’incluyir la protección de menores nel análisis del problema.

La performance de Rapiegas insiste na parte del sistema que menos visibilidá tuvo históricamente: la demanda masculina.

Nun esiste un censu fiable que permita saber cuántos homes paguen por prostitución n’Asturies, pero el problema ensiértase nuna dinámica de violencia contra les muyeres que permite la cosificación y la normalización de comportamientos contrarios a la propia dignidá humana de los que les muyeres son continuamente víctimes.  Los últimos datos de condergues por violencia sexual recoyíos  amuesen que cerca del 98% de les persones condenaes por esti tipu de delitos son homes.

La cuestión de cómo se constrúin dende nuevos les relaciones de poder, la sexualidá y la cosificación de les muyeres lleva tiempu presente nes movilizaciones contra les violencies machistes en Xixón, onde yá se vien reclamando educación afectivosexual y alertando de la influencia del consumu tempranu de pornografía. La llucha contra la prostitución encádrase asina nun problema más ampliu de violencia y desigualdá que vien denunciándose de manera continuada nes cais d’Asturies y yá hai años que’l feminismu asturianu vien poniendo’l focu na esplotación sexual, como fixo la Tertulia Feminista Les Comadres al reconocer el trabayu de Mabel Lozano contra la prostitución y la trata.

Asturies yá dispón formalmente d’una Estratexa pa l’Abolición de la Prostitución y la Trata con Fines d’Esplotación Sexual dende’l 2023. Como tantos otros papeles moyaos n’Asturies, agora fae falta que se trabaye de verdá nello.

La cita de Rapiegas va ser el domingu 20 de setiembre, a les 12:00 hores, na Plaza Mayor de Xixón. Pidin acudir con ropa prieto.

La organización quier que la performance seya incómoda, visible y pública. La denuncia ye clara:  ensin homes dispuestos a pagar, ¿podría esistir un mercáu de prostitución de más de mil muyeres nun país del tamañu d’Asturies?

This work is licensed under a Creative Commons Attribution 4.0 International License.