El llunes 7 de setiembre, a les 19:00 hores, los Xardinos del Náutico de Xixón van acoyer una nueva concentración por Palestina. Nesta ocasión, la convocatoria pon el focu na pena de muerte por aforcamientu convertíu n’espectáculu, aprobada n’Israel y na política del ministru de Seguridá Nacional, Itamar Ben-Gvir,

La convocatoria fala abiertamente de «nazi-sionismu» pa denunciar una deriva política na que la deshumanización de la población palestina ta cada vegada más presente nel discursu institucional israelín.

El 30 de marzu de 2026, la Knesset aprebó una llei que reinstaura la pena de muerte en términos que, como señaló inmediatamente Naciones Xuníes, resulten aplicables de manera cuasi esclusiva a palestinos. La norma convierte l’aforcamientu na pena por defectu pa palestinos condergaos por tribunales militares na Cisxordania ocupada y obliga a executar la sentencia nun máximu de 90 díes. Ver el pronunciamientu del Altu Comisionáu de la ONU

L’Altu Comisionáu de Naciones Xuníes pa los Drechos Humanos, Volker Türk, reclamó al día siguiente la derogación inmediata de la llei, calificándola de discriminatoria ya incompatible coles obligaciones internacionales d’Israel en materia de drechu a la vida y debíu procesu.

La llei nun ye formalmente «la llei de Ben-Gvir», pero’l ministru y el so partíu, Poder Xudíu —Otzma Yehudit—, fueron los principales impulsores políticos de la pena capital.

La forca convirtióse mesmo nun emblema políticu. Ben-Gvir y otros miembros del so partíu llegaron a llevar na Knesset pines en forma de soga como demostración de sofitu a la pena de muerte.

El 18 d’agostu, el propiu Ben-Gvir difundió un videu anunciando que empezara la construcción de lo que denominó una «instalación d’aforcamientu». Nel centru van construyise’l patíbulu y un pabellón pa los condergaos a muerte. 

Dos díes dempués conocióse amás que’l proyectu contempla cabines d’observación pa qu’espectadores puedan contemplar les execuciones;«Tamos cumpliendo lo que prometimos», presumió’l ministru.

La brutalidá nun queda namás na política penitenciaria. Hai pocos díes, Ben-Gvir defendió públicamente realizar ataques en Gaza que mataren «ente 30 y 40» persones cada nueche, esclariando que nun falaba namás de persones que representaren una amenaza inmediata:

«Hai persones ellí que nun merecen vivir. Nun deberían vivir. Nun son nin persones».

Les declaraciones fueron realizaes nun podcast xunto al antiguu rehén Rom Braslavski y tuvieron amplia repercusión internacional. 

El drechu internacional ye inequívocu sobre la prohibición d’atacar deliberadamente población civil. Pero esti tipu de declaraciones de deshumanización y llamamientu a matar yá formen parte habitual del discursu d’un ministru del Gobiernu israelín.

Un informe de Naciones Xuníes recueye que tien ocho condenes penales, ente elles por apoyu a una organización terrorista ya incitación al racismu. 

El so historial políticu remóntase a décades atrás. N’ochobre de 1995, unes selmanes antes del asesinatu del primer ministru israelín Isaac Rabin por un estremista xudíu, un Ben-Gvir de 19 años apaeció ante les cámares enseñando un emblema arrancáu del coche de Rabin. «Igual que llegamos hasta esti emblema, podemos llegar hasta Rabin», declaró.

Tres selmanes dempués, Rabin foi asesináu. Décades dempués, aquel activista d’estrema derecha convirtióse nel ministru responsable de la policía y del sistema penitenciariu israelín.

La política contra los presos palestinos tampoco queda na retórica. Ben-Gvir vien faciendo bandera del endurecimientu de les condiciones penitenciaries y presumió repetidamente de reduciles al mínimu posible.

La situación llegó esti branu a un estremu difícil d’imaxinar: Israel escavó un fosu alredor de la prisión de Ketziot pa llenalu de cocodrilos del Nilo, una iniciativa impulsada directamente por Ben-Gvir y presupuestada en millones de dólares.

Un tribunal paralizó temporalmente’l proyectu, significativamente por problemes relativos al bientar de los animales, non polos drechos de los miles de palestinos encarcelaos nel centru.

La escalada tuvo otru episodiu especialmente visible cola interceptación de les flotilles que trataben de llevar ayuda humanitaria a Gaza. Ben-Gvir difundió personalmente imáxenes d’activistes deteníos, arrodiaos, maniatados y tiraos nel suelu, mientres él los increpaba.

Les imáxenes provocaron una conderga internacional poco avezada, inclusive ente gobiernos tradicionalmente próximos a Israel, que sicasí nun se traduxo en xestos y quedó en declaraciones. Namás el Gobiernu italianu llegó a convocar al embaxador israelín y calificó d’inaceptable’l tratu recibíu polos activistes, destacando amás que la intervención se produxera n’agües internacionales. 

Hai que recordar que la Comisión Internacional Independiente d’Investigación de Naciones Xuníes concluyó en setiembre de 2025 que les autoridaes israelines cometieren xenocidiu contra la población palestina de Gaza. En xunu de 2026 la mesma comisión afirmó que Israel seguía cometiendo xenocidiu y otros crímenes atroces, denunciando específicamente’l papel de los ataques contra la infancia palestina.

La pena de muerte discriminatoria, les sogues convertíes n’insignies, los patíbulos en construcción, les cabines pa contemplar execuciones, la deshumanización pública de los palestinos y l’endurecimientu estremu del sistema penitenciariu formen parte d’esa mesma realidá política.

Ante esta escalada, el llunes 7 de setiembre, a les 19:00 hores, los Xardinos del Náutico de Xixón vuelven ser puntu d’alcuentru de la solidaridá con Palestina.

Una concentración contra la pena de muerte, contra la tortura, contra la deshumanización y contra la normalización institucional de la barbarie.

Porque nesta ocasión la forca nun ye una metáfora.

La forca ta yá en construcción.

This work is licensed under a Creative Commons Attribution 4.0 International License.