Llugones pon esti llunes el ramu a les fiestes de Santa Isabel, una celebración con más d’un sieglu d’historia que combina tradición vecinal y actividaes populares.

Según la información municipal, la fiesta nació por iniciativa d’un grupu de muyeres y celébrase esti añu ente’l 28 y el 31 d’agostu. La Sociedá de Festejos Santa Isabel ye responsable d’una programación que tien nos Xigantes y Cabezudos ún de los sos símbolos principales.

Patrimoniu popular construyíu dende’l pueblu

Los Xigantes y Cabezudos de Llugones figuren ente los más antiguos d’Asturies. La so presencia nes cais ye una espresión de cultura popular que pasa de xeneración en xeneración y que depende del trabayu asociativu, non solo de la programación institucional.

La defensa d’esa identidá tamién se xuega nel nome del llugar. InfoAsturies contó cómo la presión vecinal obligó a correxir la toponimia nel intercambiador de Llugones y cómo la señalización volvió incumplir formes oficiales. La cultura nun puede quedar separada de la llingua que nombra’l territoriu.

Llugones mantién amás una actividá cultural propia, como amosó la presentación artística de Vérsica o la histórica Muestra Folklórica Internacional.

This work is licensed under a Creative Commons Attribution 4.0 International License.