La Coordinadora Ecoloxista d’Asturies denunció ante la Confederación Hidrográfica del Cantábricu un nuevu episodiu de contaminación nel conceyu de Salas. El ríu Nonaya presenta una coloración blanquecina que’l colectivu rellaciona coles esplotaciones a cielu abiertu de caolín y arcilles blanques de la cuenca
La Coordinadora Ecoloxista d’Asturies presentó una denuncia ante la Confederación Hidrográfica del Cantábricu pola aparición de lo que considera nuevos posibles vertíos d’orixe mineru nel ríu Nonaya, nel conceyu de Salas.
Les imáxenes recoyíes estos díes amuesen una coloración blancuñao tanto nel agua como nos materiales posaos nel calce’l ríu. Según la organización ambiental, l’orixe más probable taría nes mines a cielu abiertu de caolín y arcilles blanques existentes na so cuenca, anque correspuende agora a los organismos competentes determinar mediante inspecciones y analítiques la procedencia concreta de los arramaos.
El problema nun ye nuevu. Yá en 2020 hebio denuncies vecinales pola esplotación d’una mina de caolín a cielu abiertu na zona de La Espina, señalando específicamente’l peligru de contaminación de les agües pol arrastre del mineral hacia acuíferos y cauces. Denuncien la esplotación d’una mina a cielu abiertu ensin autorización
La situación resulta agora especialmente llamativa na cascada del Nonaya, un enclave natural conocíu y frecuentáu nestes feches por visitantes y senderistes. El contraste ente la imaxe avezada del ríu y el tonu llechoso que presenta tres estos episodios convierte la contaminación nun problema imposible d’ignorar.
La Coordinadora señala que nos regueros que reciben les agües procedentes de les zones mineres pue apreciase una elevada acumulación de sólidos en suspensión y sedimentos. Estes agües conflúin posteriormente nel Nonaya y acaben incorporándose a la cuenca’l Narcea.
La coloración blanco ye una señal visible de la presencia de materiales en suspensión, la organización reclama que se realicen los controles necesarios pa determinar la composición de l’agua, la concentración de sólidos y l’alcance real del episodiu sobre la biodiversidá del calce.
Nun sería’l primer casu n’Asturies nel que la llegada masiva de sólidos tresforma visualmente un cursu d’agua. La propia Confederación Hidrográfica acabó sancionando una actuación n’Obaya, en Colunga, tres una denuncia de la Coordinadora na que la turbidez de los regueros y la saturación de los cauces con sólidos fueron elementos centrales del espediente.
La Confederación Hidrográfica sanciona el baltu y tresporte d’ocalitos n’Obaya
La importancia del Nonaya tampoco termina nel propiu ríu. Les sos agües formen parte d’una rede fluvial que finalmente llega al Narcea, un sistema sometíu yá a múltiples presiones, siendo conocios los conflictos ambientales nel ríu Cauxa, afluente del Narcea, onde la Coordinadora denunció una esplotación hidroeléctrica y reclamó garantizar el caudal ecolóxicu y la protección del ecosistema fluvial.
La esplotación hidrolléutrica del ríu Cauxa lleva mediu añu furrulando ensin permisos
La principal reclamación de la Coordinadora lleva décades sobre la mesa: les agües d’escorrentía pluvial procedentes de les mines nun deberíen incorporase directamente a la rede natural de drenaxe.
La organización reclama que les esplotaciones dispongan d’infraestructures capaces de recoyer estes agües y tratalas antes de la so incorporación al mediu. Ente les soluciones necesaries tán les balses de decantación, dimensionaes con capacidá suficiente pa retener los sólidos arrastraos inclusive nos momentos nos que aumenta’l caudal por mor de tormentes y episodios de lluvia intensa.
Nun ye abondo con disponer formalmente d’estes infracadarmes si la so capacidá resulta insuficiente precisamente cuando más falta faen.
Problemes asemeyaos vienen repitiéndose n’otros puntos d’Asturies. Nel polígonu de Santianes, en Sariegu, la Confederación Hidrográfica sancionó arramaos al ríu Nora dempués d’años de denuncies pola falta d’instalaciones adecuaes de control, depuración y evacuación de les agües.
Nueva sanción por arramaos nel Polígonu Santianes
El casu demuestra que les sanciones puntuales, cuando nun van acompañaes de soluciones estructurales, nun necesariamente terminen col problema.
Dende la Coordinadora responsabilicen tamién de la persistencia de la situación a la falta d’un control suficientemente eficaz de les alministraciones. El colectivu considera que nin la Confederación Hidrográfica del Cantábricu nin el Gobiernu d’Asturies consiguieron imponer hasta agora soluciones definitives que torguen l’arrastre de materiales dende les esplotaciones mineres de la zona hacia los cauces.
La denuncia reclama una actuación que vaya más allá de responder a cada episodiu una vegada producíu. Dempués d’años de quexes, los ecoloxistes consideren necesario revisar los sistemes de drenaxe, decantación y tratamientu de les esplotaciones, comprobar el cumplimientu de les autorizaciones y establecer controles suficientes sobre la calidá de les agües.
La Confederación tien capacidá pa intervenir cuando se producen afecciones sobre’l dominiu públicu hidráulicu. Hai pocos meses sancionaba al Real Club de Golf de Castiello pola captación d’agua del regatu Meredal, una actuación denunciada pola mesma Coordinadora Ecoloxista.
La CHC sanciona al Real Club de Golf de Castiello por captar agua del regatu Meredal Agora, la organización espera una respuesta igualmente efectiva nel Nonaya.
La presión de l’actividá minera sobre les agües superficiales y soterránees ye una cuestión que sigue abierta n’Asturies. N’otru proyectu mineru autorizáu esti mesmu branu ente Corvera y Xixón, les posibles afecciones a manantiales, acuíferos y cursos d’agua fueron precisamente una de les principales preocupaciones plantegaes poles organizaciones ambientales. El Principáu autoriza nuevos sondeos mineros ente Corvera y Xixón
Nel casu de Salas, sicasí, nun se fala d’un riesgu hipotéticu de futuru. Les imáxenes del Nonaya amuesen un cauce y un llechu alteriaos por una intensa coloración blanquecina, y la Coordinadora lleva años reclamando soluciones pa evitar que los episodios de lluvia vuelvan arrastrar materiales de les esplotaciones hacia los regueros.
This work is licensed under a Creative Commons Attribution 4.0 International License.
