La presencia d’Escherichia coli vuelve afectar esti branu a la playa gozoniega y reabre un problema que vien d’atrás: unes infraestructures de saneamientu insuficientes pa una zona na que la población real aumenta considerablemente nos meses de mayor presión turística. El colectivu ecoloxista reclama controles sobre los vertíos y una solución definitiva.

La playa de Bañugues, en Gozón, vuelve rexistrar un episodiu de contaminación por Escherichia coli, el segundu episodiu d’estes característiques esti branu en Bañugues; pero’l problema va muncho más allá d’una incidencia puntual. La contaminación fecal del arenal y les carencies del saneamientu de la zona tienen un llargu historial, hasta’l puntu de que Bañugues volvió figurar esti 2026 nel informe Banderas Negras, que señala precisamente les «graves deficiencies en saneamientu de la costa asturiana» y escueye esti arenal como casu representativu n’Asturies.

La situación de Bañugues evidencia un problema que nun afecta únicamente a esti arenal: les redes de saneamientu y depuración dimensionaes pa una población residente determinada pueden quedar curties cuando, nos meses de branu, esa población real se multiplica pola llegada de turistes, ocupantes de segundes residencies y visitantes.

El crecimientu turísticu ta provocando diferencies cada vegada mayores ente la población empadronada y la población que realmente utiliza los servicios públicos en temporada alta. InfoAsturies yá recoyía en 2024 cómo cinco conceyos asturianos figuraben ente los territorios con mayor presión turística del Estáu, llegando en dalgunos casos hasta los 20 visitantes por habitante. Nun se trata solo d’aparcamientos, tráficu o saturación de les playes: cada persona adicional consume agua y xenera agües residuales que tienen que ser recoyíes, transportaes y depuraes.

Esta realidá yá taba nel centru de la propuesta d’una Llei de Turismu Caltenible presentada a los conceyos asturianos, que plantegaba precisamente que la llegada masiva de visitantes xenera costes adicionales sobre los servicios públicos locales. El saneamientu ye ún d’esos servicios básicos que nun puede planificase tomando como única referencia’l padrón municipal cuando la población efectiva se dispara durante una parte del añu.

De fechu, hai una relación documentada ente les carencies del saneamientu de Bañugues y los episodios históricos de contaminación del arenal, y la mayor carga estival qu’aumenta la presión sobre una infraestructura que lleva años señalándose como insuficiente.

La presencia elevada d’E. coli ye un indicador de contaminación fecal y puede tar asociada, ente otros factores, a vertíos d’agües residuales o fallos nos sistemes de saneamientu. La ingestión accidental d’agua contaminada aumenta especialmente’l riesgu de trastornos gastrointestinales.

La falta d’un saneamientu adecuáu en Bañugues nun ye nueva. Yá nel informe Banderas Negras de 2023 señalábase que’l regueru de Llantada recibía vertíos de zones ensin saneamientu y acababa llevando esa contaminación hasta la playa. L’informe reclamaba entós que les agües residuales se depuraren antes de llegar a la mar y recordaba que la calidá del agua obligara a cuestionar el bañu en distintes ocasiones.

Tres años depués, la cuestión sigue ensin quedar definitivamente resuelta. Esiste, eso sí, un Proyecto de saneamientu de Bañugues promovíu pola Secretaría d’Estáu de Mediu Ambiente, adjudicáu en 2025 por 6,18 millones d’euros y financiáu con fondos europeos del Plan de Recuperación. El contratu contempla específicamente la construcción d’infraestructures pa agües residuales.

La existencia d’esta inversión confirma que’l problema de saneamientu de la zona ye conocíu y que precisa una actuación estructural. La cuestión ye que, mientres les obres nun resuelvan de manera efectiva la recoyida y depuración de les agües residuales, los episodios de contaminación siguen apareciendo precisamente nel momentu más delicáu: cuando más xente utiliza la playa y mayor ye la carga que soporten les infraestructures.

La presión turística sobre los servicios públicos nun ye un debate esclusivu de Bañugues, la masificación turística que viven distintos conceyos asturianos tien consecuencies y  costes ambientales,

This work is licensed under a Creative Commons Attribution 4.0 International License.