Andecha Astur convoca pal 16 d’agostu’l so actu añal de memoria y revindicación, que va entamar cola X Xubía a les Trincheres de L’Abidular–Filispardi y va siguir col homenaxe floral y políticu nel Puertu Tarna.
El Puertu Tarna va tornar esti domingu 16 d’agostu a convertise nun llugar d’alcordanza de la resistencia antifacista y de reivindicación de la soberanía asturiana. Andecha Astur convoca un añu más l’homenaxe a la Declaración de Soberanía del Conseyu d’Asturies y Llión, siguiendo una cita que lleva años axuntando memoria hestórica, reivindicación política y confraternización. L’homenaxe del añu pasáu volvió poner nel centru la idea de recuperar la capacidá del pueblu asturianu pa decidir llibremente’l so futuru.
La xornada va entamar a les 10:00 hores cola X Xubía a les Trincheres de L’Abidular–Filispardi, una ascensión que se convirtió nuna parte insepartable de la convocatoria. Nesi espaciu de la Cordal, a más de 1.800 metros d’altor, caltiénense restos de les posiciones defensives dende les que se frenó l’avance de les tropes franquistes. Yá en convocatories anteriores, como na VI Xubía a les Trincheres de Tarna, la visita plantegóse como una manera d’averase directamente a los escenarios nos que se desenvolvió aquella resistencia.
A les 13:30 hores, de vuelta nel Puertu Tarna, va tener llugar l’homenaxe floral y políticu delantre’l monumentu dedicáu a la Declaración de Soberanía. El 24 d’agostu de 1937, el Conseyu Interprovincial d’Asturies y Llión declaróse Conseyu Soberanu y asumió les competencies civiles y militares del territoriu que controlaba, nun episodiu que dende Andecha Astur reivindiquen como ún de los principales referentes contemporáneos del derechu d’Asturies a gobernase. La revindicación de la soberanía tien amás otros precedentes na historia asturiana, como la declaración de soberanía de la Xunta Xeneral en 1808.
L’actu nun quier quedar, sicasí, nuna evocación del pasáu. La organización vien insistiendo nes sos convocatories en presentar el Conseyu Soberanu como una referencia con proyección nel presente, venceyando memoria y soberanía cola posibilidá de que los asturianos decidan sobre’l modelu económicu, social, cultural y políticu del país. Esa mesma idea tuvo presente nes caberes movilizaciones del Díi de la Nación Asturiana, nes que la figura de Belarmino Tomás y el Conseyu volvieron funcionar como nexu ente memoria hestórica y reivindicación actual.
Dempués del homenaxe, la xornada va siguir con una xinta na Nalona, recuperando’l componente de convivencia que tradicionalmente pon el pieslle a la cita de Tarna. Una xornada que, como resume la convocatoria d’esti añu, pretende convertir l’alcordanza nun elementu activu: «Recuperar la memoria del Conseyu Soberanu nun ye namás recordar el pasáu. Ye reivindicar la capacidá del pueblu asturianu para gobernase, defender los sos intereses y decidir llibremente’l so futuru».
Asina, esti domingu Tarna va volver axuntar tres elementos que vienen marcando l’actu dende hai años: les trincheres como testimoniu material de la resistencia, el monumentu como alcordanza de la Declaración de Soberanía y una reivindicación política que busca treslladar aquella memoria al presente. Una cita que Andecha Astur resume en tres pallabres: memoria, dignidá y soberanía.
This work is licensed under a Creative Commons Attribution 4.0 International License.
