El Conseyu de Transparencia diera al conceyu un plazu máximu de venti díes hábiles pa responder una pregunta bien concreta: si cumple la llei y tien catalogados los horros y paneres d’Illas y cómo pue consultase esa documentación. En cuenta de facilitar la información, l’Ayuntamientu presentó un recursu contenciosu-alministrativu y solicitó la suspensión de la resolución

Horru Online ye una iniciativa ciudadana dedicada a documentar y denunciar la perda, l’abandonu y l’esbarrumbe de horros, paneres y cabazos n’Asturies. La plataforma recueye información organizada por conceyos, espubliza documentación llegal y bibliográfica y ufierta asesoramientu a les persones esmolecíes pola conservación d’esti padremuñu. El so propósitu declaráu ye «torgar l’esbarrumbe d’horros ya paneres n’Asturies».

Una de les actuaciones impulsaes pola iniciativa foi solicitar al Ayuntamientu d’Illas información sobre la catalogación de los horros y paneres existentes nel conceyu. La petición, rexistrada’l 21 d’ochobre del 2025, nun solicitaba la ellaboración d’un estudiu nuevu nin requería una investigación complexa. Entrugaba namás si’l consistoriu tenía fecha dalguna catalogación y, en casu afirmativu, cómo podía consultase o consiguise una copia.

La solicitú venceyábase a les obligaciones establecíes pola Llei 1/2001, de Patrimoniu Cultural d’Asturies. Con rigor xurídicu, l’artículu 27 nun cita espresamente tolos horros, paneres y cabazos, sinón qu’obliga a los ayuntamientos a incluyir nos catálogos urbanísticos los bienes inmuebles que merezan conservación pol so interés históricu, artísticu, arqueolóxicu, etnográficu o cultural. La mesma norma señala que la falta de planeamientu municipal nun pue utilizase como escusa pa incumplir esta obligación.

Ye l’artículu 74’l que concreta que’l Principáu y los ayuntamientos tienen de facer un estudiu completu de los elementos d’arquitectura tradicional con interés cultural y incluyilos nos catálogos urbanísticos de protección. La llei dedica, amás, l’artículu 75 específicamente a los horros, paneres y cabazos y afita un réxime provisional de protección integral pa los construyíos enantes de 1940 que caltengan la so fisonomía tradicional y la venceyadura col alrodiu, mentanto nun se complete’l so estudiu individualizáu o s’apreben los catálogos correspondientes.

La primer reacción del Ayuntamientu d’Illas nun foi retrucar sobre’l catálogu, sinón requerir que la solicitú se presentara otra vuelta en castellán porque taba redactada n’asturianu. Como Horru Online retrucare na mesma llingua, el consistoriu consideró que nun se subsanara la petición y dictó una resolución el 27 de payares del 2025 dando al solicitante por desistíu y archivando l’espediente.

Presentaron entós una reclamación ante’l Conseyu de Transparencia y Bon Gobiernu, autoridá alministrativa independiente d’ámbitu estatal y con sede en Madrid. Esti organismu ye competente pa resolver les reclamaciones en materia de tresparencia presentaes contra les alministraciones asturianes en virtú del conveniu existente col Principáu.

Na resolución del 21 de mayu del 2026, el Conseyu refugó los argumentos municipales. Señaló que los impedimentos formales nun puen utilizase pa dexar ensin efeutu’l derechu d’accesu a la información pública y recordó que l’Ayuntamientu yá admitiera anteriormente escritos n’asturianu, lo que demuestra que pescancien esa llingua.

El Conseyu consideró que la petición resultaba perfectamente comprensible, que contenía tolos datos necesarios pa tramitala y que l’usu del asturianu nun podía convertise nuna escusa pa impedir l’exerciciu d’un derechu reconocíu constitucionalmente. Tamién destacó «l’induldable interés públicu» de la información solicitada y que’l conceyu nun alegara nenguna de les causes llegales que permitiríen negar l’accesu.

La resolución estimó íntegramente la reclamación y dio al Ayuntamientu d’Illas un plazu máximu de venti díes hábiles pa comunicar si tenía fecha dalguna catalogación de los horros y paneres del conceyu y, de ser asina, indicar cómo consultala o acceder a una copia. Tamién tenía que remitir al Conseyu de Transparencia una copia de la respuesta entregada.

Sicasí, la información siguió ensin llegar. Nuna comunicación del Conseyu de Transparencia apurrida a Horru Online costa que’l 16 de xunu del 2026 l’Ayuntamientu d’Illas informó de la presentación d’un recursu contenciosu-alministrativu ante la Sala de lo Contencioso-Administrativo de la Audiencia Nacional contra la resolución. El consistoriu pidió, amás, la suspensión de la so execución como midida cautelar.

Nel momentu de redactase la comunicación, el Conseyu indicaba que nun recibiera nenguna otra noticia nel espediente. Esto significa que costaba la petición municipal de suspensión, pero non que’l tribunal la concediera. La presentación del recursu nun suspende automáticamente la resolución: la midida cautelar tien que decidila l’órganu xudicial, dempués d’escuchar a les partes y valorar los intereses en conflictu.

Horru Online calcula que’l procesu xudicial pue retrasar la respuesta ente seis meses y tres años. Pa la plataforma, el resultáu ye difícil d’entender: una pregunta que podía contestase indicando si existe un documentu y cómo consultalu acaba na Audiencia Nacional, col consumu de tiempu, medios alministrativos y recursos públicos que lleva apareyáu un pleitu.

La situación resulta entá más llamativa porque les propies normes del Plan Xeneral d’Ordenación d’Illas, espublizaes nel BOPA, indiquen que’l conceyu dispón d’un Catálogu Urbanísticu tramitáu separadamente, con una relación individualizada de bienes, fiches de cada elementu y distintos niveles de protección. El documentu señala espresamente que, dientro del patrimoniu etnográficu, se recueyen elementos como horros, paneres y molinos, incluyendo nel catálogu los consideraos verdaderamente singulares.

Esa referencia pública nun permite conocer por sigo sola cuántos horros y paneres tán incorporaos, cuáles son, qué protección tienen o cómo acceder a les fiches completes. Precisamente eso ye lo qu’entrugaba la solicitú presentada en 2025.

Cuasi un añu dempués, la cuestión esencial continúa ensin rempuesta: ¿tien l’Ayuntamientu d’Illas catalogáu esti patrimoniu y pue la ciudadanía consultar el mesmu? En cuenta d’aclarialo, el consistoriu optó por llevar ante los tribunales una resolución que lu obligaba a facilitar esa información.

This work is licensed under a Creative Commons Attribution 4.0 International License.