La nueva entrega de la revista editada pola Academia de la Llingua Asturiana recueye, a lo llargo de más de mil páxines, bona parte de los trabayos presentaos nel Congresu Mundial de Cultura Asturiana, celebráu en febreru del 2025

El númberu 29 de ‘Cultures. Revista Asturiana de Cultura’ vien d’asoleyase en dos volúmenes que concentren la mayor parte de les investigaciones y comunicaciones presentaes nel Congresu Mundial de Cultura Asturiana (CMCA), celebráu n’Asturies en febreru del 2025.

La espublización ye’l resultáu de meses de trabayu por parte de los autores, les persones encargaes de coordinar les distintes estayes y l’equipu editorial de la revista. El procesu d’escritura, revisión y maquetación permitió reunir más de mil páxines de conteníu dedicaes al estudiu de la cultura asturiana dende perspectives diverses.

Los dos tomos ponen de manifiestu la vitalidá de la investigación antropolóxica, etnográfica, patrimonial y sociollingüística n’Asturies. Al empar, constitúin una obra de referencia pa conocer les tresformaciones que vive la sociedá asturiana, la pervivencia de les práctiques tradicionales y los retos que se presenten pal futuru.

Los artículos repártense en seis grandes estayes temátiques: ‘Discursos d’identidá, autenticidá y patrimoniu’, ‘Cuestiones de sociollingüística’, ‘Ciudá y mundu global’, ‘Caltenimientu de vezos tradicionales’, ‘Paisaxes inmuebles y muebles’ y ‘El mundu de les creyencies’.

Esta diversidá permite averase a la realidá cultural asturiana dende ámbitos como la construcción de la identidá, los usos sociales de la llingua, les relaciones ente’l mundu urbanu y el rural, la protección del patrimoniu, la tresmisión de costumes y conocimientos o la presencia de les creyencies na cultura popular.

Dambos volúmenes tán yá en distribución y puen atopase nes principales llibreríes asturianes, amás de na llibrería de l’Academia de la Llingua Asturiana.

‘Cultures. Revista Asturiana de Cultura’ ye una publicación añal editada pola Academia de la Llingua Asturiana. Nació en 1990 col envís d’asoleyar investigaciones qu’afondaren nel estudiu de la etnografía y l’antropoloxía d’Asturies, anque les sos páxines tamién dieron cabida a trabayos sobre otres zones y realidaes culturales.

A lo llargo de la so trayeutoria, la revista contó cola collaboración d’especialistes, investigadores y persones conocedores de les realidaes llocales de los distintos conceyos y fasteres d’Asturies. Esta participación permitió documentar costumes, oficios, pallabreru, formes de vida y práutiques culturales que, en munchos casos, nun apaecen recoyíos n’otres espublizaciones.

Poro, ‘Cultures’ convirtióse nuna erbía pervalible tanto pal estudiu de la cultura popular como pal conocimientu de la llingua asturiana, al conservar terminoloxíes y pallabreros específicos venceyaos a actividaes tradicionales, oficios, paisaxes y formes d’organización comunitaria.

Colos dos tomos del númberu 29, la revista afita’l so papel como espaciu de referencia pa la investigación y la espublización del padremuñu cultural asturianu.

This work is licensed under a Creative Commons Attribution 4.0 International License.