La organización solicita l’anulación del procedimientu y presenta quexes énte’l Conseyu de Tresparencia y el Defensor del Pueblu pola posible vulneración de los derechos d’accesu a la información y participación ciudadana.
Ecoloxistes n’Aición d’Asturies solicitó al Conceyu d’Uviéu l’anulación del procedimientu alministrativu correspondiente al estudiu de viabilidá pa la construcción y esplotación d’un nuevu aparcamientu soterrañu baxo la plaza de La Escandalera. La organización considera que la retirada anticipada de la documentación de la web municipal vulneró’l derechu de la ciudadanía a participar nel trámite d’información pública.
L’anunciu, espublizáu nel númberu 118 del Boletín Oficial del Principáu d’Asturies del 22 de xunu de 2026, establecía un plazu d’un mes pa presentar alegaciones. Según Ecoloxistes n’Aición, la documentación tendría que permanecer accesible hasta’l 23 de xunetu, fecha na que remataba’l periodu d’esposición pública.
Sicasí, la organización afirma que comprobó que, polo menos dende’l 17 de xunetu, l’espediente yá nun taba disponible na páxina d’información pública del Conceyu. La documentación siguía ensin poder consultase’l día 23, coincidiendo col final del plazu establecíu pa formular alegaciones.
Pa Ecoloxistes n’Aición, esta situación torgó que cualquier persona interesada pudiera consultar l’estudiu y presentar observaciones durante la totalidá del periodu llegal. La organización entiende que la retirada de los documentos dexó ensin conteníu efectivu’l trámite d’información pública y vulneró los principios de tresparencia y participación recoyíos na normativa alministrativa.
El colectivu ecoloxista considera poco creyible que la desapaición del espediente se debiere únicamente a un fallu téunicu o a un error alministrativu. Señala que’l restu de procedimientos sometíos a información pública siguíen disponibles na web municipal, incluyíos dalgunos correspondientes a meses o años anteriores.
Poro, Ecoloxistes n’Aición sospecha que la retirada de la documentación pudo ser intencionada y reclama esplicaciones al equipu de gobiernu municipal.
“Nun sabemos de qué tien mieu l’equipu de gobiernu municipal o qué información contienen esos documentos pa que nun puedan permanecer espublizaos na web municipal, como asocede col restu de los espedientes”, afirma la organización.
El colectivu venceya’l proyectu con un modelu de movilidá que, al so xuiciu, resultaría contrariu al interés xeneral. Considera que’l nuevu aparcamientu aumentaría la entrada de vehículos nel centru d’Uviéu, incrementaría la contaminación y supondría la creación d’otra plaza dura nun espaciu urbanu emblemáticu.
“Lo que sí sabemos ye qu’esti ye un negociu mui rentable pa determinaes empreses y que va facese a costa del interés xeneral, porque se plantega introducir más tráficu nel centru, más contaminación y la enésima plaza dura; esto ye, xusto lo contrario de lo que tendría que facese”, denuncia la organización. Independientemente de la conveniencia o non de facer esti aparcamientu, el fechu ye que’l procedimientu nun sigue’l calce llegal.
Ecoloxistes n’Aición reclama l’anulación del trámite d’información pública. De manera subsidiaria, solicita que’l procedimientu vuelva atrás y s’abra un nuevu plazu completu, cola totalidá de la documentación accesible pa la ciudadanía durante tol periodu establecíu.
La organización presentó amás sendes quexes énte’l Conseyu de Tresparencia y Bon Gobiernu y el Defensor del Pueblu. Nelles solicita que s’investigue l’actuación del Conceyu d’Uviéu ante la posible vulneración del derechu d’accesu a la información pública y del derechu de participación ciudadana nun procedimientu que considera de particular relevancia pal futuru del centru de la capital asturiana.
This work is licensed under a Creative Commons Attribution 4.0 International License.
