¡Por fin se pon veda a la pesca de salmones nos ríos asturianos!
Bono, puede decise que ye una veda “amable”, como tola política del “Principado”, porque permite seguir pescando y subastando el primer salmón de la temporada, el famosu campanu, nel Narcea y nel Seya.
Nun sabe una si alegrase o entristecese, la verdá.
P’alegrase hai pocos motivos. Los científicos vienen avisando dende hai décades de que les poblaciones de salmón nos ríos asturianos tan nun declive alarmante. Les estadístiques indiquen claramente que la especie va camín del esaniciu nesti territoriu que ye’l más al sur de la distribución del salmón atlánticu.
Probablemente esta midía, amás de ser tímida, llega tarde pa esta especie emblemática de los nuesos ríos y indicador fiel de la salú ecolóxica de los mesmos.
Mientres n’Euskadi y Navarra lleva años prohibía la so pesca, equí l’Alministración asturiana diba aplazando irresponsablemente la decisión por mieu a la reación del lobi de les asociaciones de pescaores, siempre apelando a la tradición pa seguir pescando. Como si los ríos asturianos y lo que nellos vive nun fuera patrimoniu de tolos asturianos. Como si los ríos asturianos y tolo que nellos vive fuera solo d’unos pocos y al serviciu de la so diversión.
Si el “Principado” mirara por esi patrimoniu de toos, como ye la so obligación, la decisión ensin dulda debería ser la prohibición dafechu y permanente de la pesca del salmón —salvo con fines científicos y reproductivos— y la so inclusión nel LESPRE (Llistáu d’especies silvestres en Réxime de Protección Especial), polo menos hasta que les poblaciones se recuperen.
Pero esto ye difícil que pase porque los ríos asturianos nun son ayenos al cambiu climáticu, con ca vez con menos caudal y mayor temperatura del agua. Amás, sufren una contaminación importante y una esplotación deportiva masiva, sobre too en branu, como ye’l casu del Seya y los sos afluentes.
Pero nesti tema, cola decisión de la veda a medies, el “Principado” nun actúa de forma responsable, paez que les decisiones tienen que contentar solo a los pescaores y les sos asociaciones.
Éstos afirmen que son los “cuidadores del ríu” y qu’ensin ellos, y les repoblaciones que lleven a cabu, nun habría nin trucha nin salmón nos ríos asturianos.
Ye más qu’evidente que’l fin d’eses repoblaciones que faen —con escasu ésitu, como se puede comprobar— ye surtir a los ríos pa seguir col so safari particular.
La sociedá asturiana ta abondo concienciada sobre la protección del mediu ambiente y ta perfechamente madura p’asumir que la veda tien de ser total.
Ye bien fácil d’esplicar. ¿Daquién pue maxinar que se dieren llicencies pa cazar un cupu d’osos pardos nos nuesos montes y que’l primeru que se cace seya espuestu y subastáu públicamente con honores pal cazaor y pagándose precios desorbitaos pola so carne?
Pues esa ye l’aberración a la que añu tres añu asistimos col salmón. Y tien qu’acabase, si non les xeneraciones futures xulgaránmos como unos bárbaros insensatos que fuimos acabando cola especie irresponsable y coscientemente, y amás, faciendo un circu d’ello.
Mª Carme Pérez
This work is licensed under a Creative Commons Attribution 4.0 International License.
