Convocatoria de manifestamientu pa güei pela tardi n’Uviéu

El manifestamientu del 22 de xunu de 1976 reclamó la entrada darréu de la llingua y la cultura asturianes na escuela y una autonomía rexonal efectiva; mediu sieglu dempués, Asturies sobrovive con un estatutu impuestu y una llingua minorizada, ensin oficialidá y ensin plenos drechos.

Güei convócase otru manifestamientu pa pidir prauticamente lo mesmo qu’hai mediu sieglu

El 22 de xunu de 1976, cuando nun pasara nin un añu dende la muerte de Franco, miles de persones salieron a les cais de Xixón detrás d’una pancarta que resumía dos demandes: «Bable a la escuela. Autonomía rexonal». Destaca la claridá cola que se veía entós que la llingua nun podía avanzar separtada de l’avance políticu, que drechos llingüísticos y drechos nacionales diben de la man. Nun yera una celebración folclórica nin un actu cultural, yera una movilización política que reclamaba recuperar la llingua propia y dar a Asturies capacidá pa decidir sobre los sos asuntos.

La manifestación salió del paséu de Begoña, énte’l Teatru Xovellanos, y percorrió Fernández Vallín, Corrida, Trinidad y San Bernardo hasta llegar a la Plaza Mayor. Les estimaciones de participación oscilen ente les 6.000 y les 7.000 persones, una cifra especialmente significativa nuna sociedá que salía de cuatro décades de dictadura y na que manifestase siguía produciendo mieu. La marcha desendolcóse baxo una estrecha xixilancia policial y ente la lluvia que cayó sobre Xixón aquella tarde.

Conceyu Bable impulsara la convocatoria, a la que se sumaron asociaciones vecinales y culturales, organizaciones sindicales y bona parte de la oposición democrática. Tuvieron una presencia destacada les asociaciones de vecinos de Pumarín, Roces, La Calzada y Nuevu Xixón, amás de formaciones integraes na Coordinación Democrática Asturiana. Aquella combinación de reivindicación llingüística, movimientu vecinal y oposición antifranquista convirtió la marcha nuna de les primeres grandes espresiones polítiques de la Transición n’Asturies.

La manifestación foi’l puntu culminante de la campaña ‘Bable nes escueles’, qu’atropó alredor de 35.000 firmes. L’oxetivu inmediatu yera bien concretu: que la comisión estatal de llingües rexonales acelerara los sos trabayos y que l’asturianu pudiera incorporase yá nel cursu siguiente como materia optativa na Educación Xeneral Básica.

La propuesta educativa de Conceyu Bable diba más allá d’una asignatura testimonial. Plantegaba enseñar la variante del asturianu propia de cada zona, trabayar la llectura, la gramática, el vocabulariu y la escritura ya incorporar tamién la historia, l’arte y la cultura d’Asturies. El modelu defendíu yera temporalmente voluntariu y aspiraba a conceder al asturianu una presencia educativa comparable a la del castellán.

L’autonomía tampoco s’entendía únicamente como la creación d’una administración territorial. La marcha espresaba una aspiración de control sobre los recursos económicos, capacidá política propia y llibertá d’actuación. Les pancartes y los glayíos incorporaron amás demandes d’amnistía, llibertá y defensa de los barrios, nun momentu nel que les estructures represives de la dictadura siguíen actives.

La situación política camudó. Asturies recibió de manes del estáu un Estatutu d’Autonomía nel añu 1981, ensin poder votalu como si ficieron otros territorios históricos, sinón que foi impuestu, con notables llagunes, pasando a contar con una Xunta Xeneral, un Gobiernu y una Presidencia propies, pero d’algame y capacidá enta güei llendaes. 

Asturies recibió competencies y instituciones, pero dientro d’un marcu nel que les decisiones fundamentales sobre fiscalidá, financiación, infracadarmes, relaciones llaborales o recursos estratéxicos continúen condicionaes o reservaes al Estáu. Un Estatutu que lleva ensin una reforma sustancial dende 1999, cuando se reformó parcialmente, tamién ensin votación por parte de los asturianos.

La enseñanza del asturianu nun empezó nel cursu 1976-1977, como reclamaben los convocantes. Hubo qu’esperar hasta 1984, cuando un proyectu pilotu introduxo oficialmente la materia en seis centros escolares. Aquello representó un avance históricu, pero nació como una esperiencia voluntaria, llendada ya ensin plantegar nin la obligatoriedá nin l’asturianu como llingua vehicular del sistema educativu.

La Llei d’Usu y Promoción de 1998 garantiza -teóricamente- la enseñanza del asturianu en tolos niveles educativos y reconozlo como materia integrante del currículu. Tamién afirma’l derechu de la ciudadanía a usalo nes comunicaciones col Principáu. Sicasí, caltién la voluntariedá del aprendizaxe, nun concede a la llingua la condición d’oficial. Les disposiciones, lleis y documentos administrativos tienen que publicase obligatoriamente en castellanu cuando produzcan efectos frente a terceros, ente que la versión asturiana continúa siendo potestativa; y lo pior, esta ruina llei nin siquier se cumple.

L’asturianu sigue ensin la protección xurídica que tienen les llingües oficiales, continúa dependiendo de decisiones polítiques coyunturales, cuando non del caprichu del funcionariau, y nun garantiza a los sos falantes los mesmos drechos que’l castellán…

Pa recordar aquella movilización y facer balance d’estos cincuenta años, el xueves 23 de xunetu de 2026, a les 19:30 hores, va cellebrase nel Club Prensa Asturiana de La Nueva España, n’Uviéu, l’actu conmemorativu ‘50 años de la manifestación, 50 años avanzando’.

L’alcuentru, presentáu por Les Asturxules, ta entamáu pol Movimientu 26 de Mayu, cola collaboración d’UABRA. La convocatoria recupera la memoria d’aquella marcha del 22 de xunu de 1976, pero tamién obliga a mirar al presente: cincuenta años dempués, les dos grandes demandes de la pancarta siguen esperando completar el camín.

This work is licensed under a Creative Commons Attribution 4.0 International License.