L’Ayuntamientu aprovecha la fola futbolera pa convertir l’espaciu públicu nun escaparate del más ranciu nacionalismu español

Opinión: Llucía Fernández Marqués

L’Ayuntamientu de Xixón torna amenazar la ciudá cola instalación d’una banderona española. Nesta ocasión, el proyectu yá tien allugamientu y calendariu: la rotonda situada ente l’avenida d’El Molinón y l’estadiu, por supuesto, porque’l nacionalismu español sabe bien que’l fútbol ye una de les sos ferramientes de propaganda más eficaces. La cimentación cuenta colos cálculos técnicos previos, la licitación va entamase nes próximes selmanes y la previsión municipal ye que’l mástil y la bandera tean instalaos na seronda.

Nun tamos énte una cuestión decorativa. Nun ye mobiliariu urbanu, nun ye una obra necesaria nin una demanda ciudadana. Ye una demostración de poder. Un mástil xigante con una bandera descomanada nun val pa representar: val pa imponese, pa recordar quién manda, qué identidá tien privilexos y cuál tien de permanecer escondida, folklorizada o reducida a los díes de fiesta.

La operación llega envolubrada na fola patriotera provocada pola selección española y na fabricación mediática d’una supuesta unanimidá nacional. Gana un equipu de fútbol y, de sópitu millones de persones abandonen toa crítica pa compartir bandera, monarquía, estáu y sentimentu nacional. El deporte conviértese en coartada política y la celebración colectiva úsase pa blanquear una simboloxía cargada d’historia, imposición y violencia.

Porque la roxigualda nun cayó del cielu nin ye un símbolu inocente. Nació nel sieglu XVIII como enseña de la Marina de guerra de la monarquía borbónica. Foi convertida en bandera xeneral baxo Isabel II, recuperada pol bandu golpista en 1936, asumida pola dictadura franquista y conservada pola Transición, que cambió l’escudu pero nun cuestionó’l marcu políticu, nacional y monárquicu.

La idega de la banderona en Xixón nun ye nueva y ñaz d’un típicu “yo téngola más grande” propiciau pola d’Uviéu. En 2014 foi’l PP quien reclamó un espaciu específicu d’homenaxe a la bandera española. En 2019, Vox propunxo instalar una gran enseña na plaza d’El Humedal, iniciativa que nun consiguió salir alantre. En 2024, la formación ultraderechista volvió llevala al Plenu y consiguió la so aprobación col apoyu de Foro y PP, pero la fuerte fola de refuga popular detuvo la instalación, que se pospuso fasta esti momentu, cuando l’usu de la monárquica ta xeneralizau gracies a una habil maniobra propagandístico de blanquéu de la enseña española de la man del mundial de fúbol.

Asina, lo que nació como una revindicación del nacionalismu español más agresivu y retrógradu acaba convirtiéndose nuna actuación municipal asumida y executada pol Gobiernu de la ciudá. La ultraderecha marca l’axenda simbólica y los partidos que se presenten como moderaos encárguense de convertela en política municipal. Güei ye una banderona. Mañana será otra campaña contra l’asturianu, otra revisión de la memoria democrática o otra concesión al discursu reaccionariu.

Vox marca’l terrén ideolóxicu y los demás encárguense d’asfaltalu, cimentalu y pone-y un mástil.

This work is licensed under a Creative Commons Attribution 4.0 International License.