Coincidiendo cola celebración de La Descarga, vuelven les protestes pola esclusión de les muyeres del actu central de les fiestes de Cangas del Narcea. Les cangueses pueden participar en peñes y tirar voladores n’otros momentos del programa, pero siguen ensin poder facelo na descarga de les ocho de la tarde nin exercer d’apurridores.

Cangas del Narcea tenía previsto cellebrar ayeri, 16 de xunetu, el día grande de les fiestes del Carmen. Sicasí, les tormentes obligaron a suspender La Descarga por motivos de seguridá. L’actu aplazóse y ta previsto que se cellebre’l 21 de xunetu, siempre que les condiciones meteorolóxiques y de seguridá lo permitan.

A les ocho de la tarde, cuando la imaxe de la Virxe llegó al centru del ponte, miles de voladores fadrán españar el valle durante unos minutos. Ye La Descarga, el principal actu d’una celebración declarada Fiesta d’Interés Turísticu d’Asturies y promovida públicamente pol Conceyu y pelos organismos turísticos autonómicos.

Pero, como vien pasando dende hai años, la emoción y la pólvora conviven con una discriminación difícil de xustificar: les muyeres nun pueden participar como tiradores nin como apurridores nel actu central. Una protesta difundida esti xueves vuelve denunciar que les cangueses queden relegaes al papel d’espectadores, ensin poder entregar los voladores a quien los dispara nin participar directamente na descarga más importante de les fiestes.

La Descarga ta organizada pola Sociedá d’Artesanos Nuestra Señora del Carmen, una entidá fundada en 1902 y integrada tradicionalmente por homes. Una investigación espublizada en 2024 documentó que la pertenencia a la Sociedá taba vedada a les muyeres y que, al ser necesario formar parte de la entidá organizadora pa tirar nel actu principal, esa esclusión impedía-yos participar. La mesma información recoyía testimonios de muyeres cangueses, intentos d’ingresu refugaos y una recoyida de más de 1.100 firmes presentada nel Conceyu ensin recibir respuesta.

La páxina oficial de la Sociedá publica anguaño una xunta directiva compuesta íntegramente por homes. Les normes de seguridá disponibles na mesma web afiten que pa participar hai que ser mayor de 18 años, tener seguru y acreditación, pero nun inclúin nenguna razón técnica que xustifique una diferencia ente homes y muyeres. Tamién regulen específicamente les funciones de los tiradores y de los apurridores.

El programa oficial de 2026 inclúi, a la una de la madrugada, un espectáculu pirotécnicu de les peñes femenines. Esto demuestra que les muyeres pueden recibir formación, cumplir les normes de seguridá y manipular voladores. Pero esa participación separada nun resuelve’l problema central: pueden tirar cuando-yos asigna la organización, pero non nel momentu más simbólicu y reconocíu de les fiestes, reserváu tradicionalmente a los miembros de la Sociedá d’Artesanos.

La polémica nun ye nueva. Yá en 2005 se celebró en Cangas una mesa redonda sobre tradiciones discriminatories y, a lo llargo de les últimes décades, delles muyeres solicitaron poder entrar na Sociedá o participar na Descarga. Según los testimonios recoyíos, la respuesta foi negativa, incluso cuando les solicitantes cumplíen les condiciones y disponíen de la formación necesaria pa tirar voladores.

La protesta d’esti añu nun cuestiona la fiesta, la devoción nin la importancia cultural de La Descarga. Cuestiona que la tradición s’utilice pa perpetuar una división basada exclusivamente nel sexu. La tradición ye tirar voladores y homenaxar a la Virxe del Carmen; que quien los tire tenga que ser un home nun ye una necesidá cultural, técnica nin de seguridá.

Resulta especialmente llamativu’l silenciu de les alministraciones. El Conceyu de Cangas del Narcea participa na organización de les fiestes, regula la seguridá y promociona l’acontecimientu, mentes el Gobiernu asturianu reconoz y difunde La Descarga como Fiesta d’Interés Turísticu. Sicasí, nun consta una intervención pública eficaz pa garantizar que les muyeres puedan participar nel actu central en condiciones d’igualdá.

La Llei asturiana d’igualdá tien como oxetivu garantizar la igualdá efectiva de derechos, tratu y oportunidaes ente muyeres y homes, tanto nel ámbitu públicu como nel priváu. Ello nun resuelve automáticamente’l debate xurídicu sobre una asociación privada, pero sí obliga a preguntase qué papel tienen que desempeñar les instituciones cuando una fiesta reconocida, promocionada y desarrollada n’espacios públicos caltién una esclusión tan evidente.

This work is licensed under a Creative Commons Attribution 4.0 International License.