El xueves 18 de xunu de 2026, a les 19:30 hores, el llar de l’Academia de la Llingua Asturiana va acoyer una nueva sesión de los «Alcuentros na ALLA», que nesta cuarta edición va tener como protagonista al académicu de númberu y caderalgu de Ciencia Política y profesor eméritu de la Euskal Herriko Unibertsitatea, Francisco Llera.
Mientres l’alcuentru, Llera va abordar el llabor sociolóxicu y sociollingüísticu que desarrolla la institución, amás d’ufiertar una reflexión sobre la situación d’Asturies nestos ámbitos cuando falta un añu pa la celebración de les próximes eleiciones. Tres d’esa intervención inicial, va abrirse un espaciu d’alderique col públicu, centrado nuna estaya que l’Academia considera fundamental pal so trabayu y la so proyección social.
Los «Alcuentros na ALLA» nacieron cola intención d’abrir la institución a la comunidá, dando a conocer d’una manera más cercana, específica y personal el llabor que l’Academia vien desenvolviendo dende la so fundación, asina como los proyectos de futuru y les aportaciones de los sos integrantes. Estes xornaes celébrense con una periodicidá trimestral y tienen como escenariu’l propiu llar de la institución.
L’accesu al actu ye de baldre hasta completar l’aforu disponible, llendáu a 30 persones.
This work is licensed under a Creative Commons Attribution 4.0 International License.
