La Rede Europea de les Ciudaes de la Sidra, Cider Cities, vien d’abrir la convocatoria del primer concursu internacional de semeyes de conteníu sidreru venceyáu al proyeutu européu CIDEREU, una iniciativa qu’apuesta pola protección y promoción del patrimoniu cultural venceyáu al cultivu de la mazana y a la ellaboración de la sidre n’Europa. La fecha llende pa presentar trabayos ye’l 15 de xunetu.
Baxo’l títulu “CIDEREU Photography Contest”, el certame convida a fotógrafos profesionales y aficionaos a captar imáxenes qu’espeyen la importancia social, cultural y económica de la cultura sidrera nos territorios participantes. Nesta primer edición, la organización quier poner una atención especial nes persones que caltienen vivu esti patrimoniu, con especial protagonismu de les muyeres que contribúin a la tresmisión de conocencies, a la innovación y a la continuidá de les tradiciones rurales.
Les semeyes podrán centrase en cuestiones como’l cultivu tradicional de la mazana, les práctiques venceyaes a la producción de sidre o’l papel de les comunidaes rurales na conservación d’esti legáu cultural.
Cider Cities ye una rede europea que xune ciudaes y territorios con una fonda tradición sidrera. El so oxetivu principal ye promover la cooperación ente rexones productores, intercambiar bones práctiques y dar visibilidá a un patrimoniu compartíu que forma parte de la identidá de numberoses zones europees. Na actualidá, la rede ta integrada por diez ciudaes y territorios europeos.
Nel casu d’Asturies formen parte del proyeutu los conceyos de Xixón, Nava y Villaviciosa, a los qu’acompañen otros territorios sidreros d’España (Valleseco), Euskal Herría (Kuartango), República Checa (Chelcicko – Lhenický ), Italia (Saint -Marcel), Francia (Urrugne), Portugal (Carrazeda de Ansiaes) y Eslovenia (Celje).
El concursu enmárcase dientro del proyeutu CIDEREU, una iniciativa impulsada por Cider Cities y financiada pola Unión Europea que tien como oxetivu preservar, investigar y poner en valor el patrimoniu cultural inmaterial venceyáu al cultivu de la mazana, la producción de sidra y los productos derivaos. El proyeutu busca reforzar la cooperación ente les rexones participantes y favorecer la tresmisión d’esti patrimoniu a les nueves xeneraciones.
Dende la organización animen a participar con imáxenes que reflexen la riqueza humana que s’atopa detrás de la cultura sidrera europea, una tradición que sigue modelando paisaxes, economíes llocales y formes de vida en distintes rexones del continente.
This work is licensed under a Creative Commons Attribution 4.0 International License.
