A menos de dos meses de que cerca de 30 animales vuelvan a ser torturaos hasta la muerte durante el mes d’agostu na Plaza de Toros de Xixón, Asturies Antitaurina fae públicos los nomes de los establecimientos xixoneses que, d’una u otra manera, sofiten la tauromaquia na ciudá.

Llistáu d’establecimientos taurinos

La organización sigue publicando nes sos redes la relación de negocios que considera cómplices de la “tauromafia” por collaborar na promoción de la feria taurina de Xixón, asoleyando los cartelos del eventu nos sos escaparates. Dellos d’ellos, amás, reconocen participar activamente asistiendo a les corríes y disfrutando d’un espectáculu basáu na muerte pública d’animales.

Dende Asturies Antitaurina recuerden que esta tradición d’orixe español sigue celebrándose anguañu n’Asturies gracies a un fuerte blindaxe políticu, a la so consideración llegal como patrimoniu cultural y al sofitu económicu, xudicial ya institucional que recibe. Según denuncien, la tauromaquia sigue beneficiándose de cuantioses ayudes públiques a pesar de la creciente oposición social que xenera.

La población asturiana lleva más d’un sieglu amosando’l so refugu a les corríes de toros y la mayor parte de la sociedá nun se siente representada por una práctica que considera incompatible col respetu a los animales y colos valores d’una sociedá moderna.

Poro, la campaña pretende visibilizar y boicotear tanto a los promotores directos de la feria como a los establecimientos que contribúin al so espardimientu, col oxetivu de fomentar l’alderique social sobre la pervivencia d’esti espectáculu y sobre’l papel que xueguen les instituciones públiques y privaes nel so caltenimientu.

This work is licensed under a Creative Commons Attribution 4.0 International License.