N’Uviéu viven soles 20.069 persones mayores de 60 años. Son más de la cuarta parte de los 76.670 uvieinos que superen esa edá. N’Asturies, más d’un terciu de los mayores d’80 años residen solos nos sos llares. 

Los datos sobre la solitú na capital asturiana fueron presentaos esta selmana dientro del programa «Uviéu al to llau», impulsáu pol Conceyu d’Uviéu pa combatir la soledá non deseyada. Pero la realidá va muncho más allá de la capital. Lo que se ve n’Uviéu ye namái una fotografía d’un fenómenu que s’estiende per tol país y que tien causes fondes venceyaes a la historia reciente d’Asturies.

Según la Estratexa Asturiana sobre la Soledá Non Deseyada 2025-2030, nel Principáu viven soles alredor de 153.000 persones, una cifra equivalente a cerca del 15% de la población total. D’elles, unes 68.760 tienen más de 65 años. La situación agrávase ente la población más avieyada: más d’un terciu de les persones mayores de 80 años residen soles nos sos llares.

Asturies ye güei la comunidá más avieyada del Estáu. Por cada cien menores de 16 años hai 265 mayores de 64. Pero’l problema nun surdió por casualidá. La soledá que sufren munchos mayores d’anguañu entamó a construyise hai décades.

La historia contemporánea d’Asturies ye tamién la historia de la emigración, les socesives “reconversiones” y les crisis económiques encadenaes sacaron a xeneraciones enteres de mozos y moces, mayormente bien formaos, que nun atopaben nel país les oportunidaes que precisaben.

Munches de les persones que güei viven soles son padres y madres d’aquellos emigrantes. Son güelos y güeles que ven a los sos fíos en vacaciones o en visites cada vegada más difíciles de conciliar. El problema nun ye la falta d’interés familiar. En munchos casos, la distancia impuesta pola economía acabó convirtiéndose tamién nuna distancia afectiva cotidiana.

A esta realidá súmase un segundu factor: la precariedá llaboral. Les xeneraciones actuales enfréntense a xornaes llargues, salarios insuficientes, dificultaes d’accesu a la vivienda y una creciente inseguridá económica. Munches families tienen que dedicar una parte enorme del so tiempu a garantizar la propia supervivencia. El resultáu ye una menor disponibilidá pa acompañar, visitar o cuidar a les persones mayores de forma frecuente.

La soledá non deseyada acaba siendo asina una consecuencia indirecta d’un modelu económicu que fragmenta les families y dificulta la convivencia ente xeneraciones.

Los datos d’Uviéu amuesen amás importantes diferencies ente territorios. Nos barrios urbanos como Pumarín, el Centru-Norte o Teatinos concéntrense munchos mayores que viven solos. Nes zones urbanes existen más recursos y servicios, pero tamién predomina una forma de vida más individualizada que favorez l’aislamientu.

Nel mediu rural la situación tien otra llectura. Les redes vecinales siguen actuando como un importante mecanismu de protección, pero l’avieyamientu y la despoblación amenacen tamién estes formes tradicionales de sofitu comunitariu. Localidaes como Tudela Veguín, Godos o Trubia reflexen esta realidá. En Tudela Veguín, por exemplu, más del 42% de les muyeres mayores de 60 años viven soles.

Precisamente les muyeres son quienes soporten la parte más dura d’esti fenómenu: siete de cada diez llares unipersonales ocupaos por persones mayores n’Asturies correspuenden a muyeres. 

Los datos d’Uviéu confirmen esta tendencia. Nel área Centro-Norte, el 37,6% de les muyeres mayores viven soles, frente al 21,2% de los homes. En Trubia la diferencia sigue siendo notable: 35,5% frente a 27,2%.

La soledá non deseyada nun ye solo un problema emocional. Cada vez hai más evidencia científica de la so repercusión na salú. L’aislamientu social aumenta’l riesgu de depresión, deterioru cognitivu, enfermedaes cardiovasculares y pérdida d’autonomía. Distintos organismos internacionales consideren yá la soledá como unu de los principales desafíos sanitarios y sociales de les sociedaes avieyaes.

Combatir la soledá pasa por reforzar los servicios sociales, pero tamién por crear condiciones que permitan a les nueves xeneraciones quedar, trabayar y vivir cerca de les sos families. Pasa por recuperar espacios de convivencia, fortalecer les redes vecinales y reconstruyir los venceyos comunitarios que durante siglos caracterizaron a Asturies.

Porque la soledá non deseyada de los mayores nun ye un problema individual nin una simple consecuencia del pasu del tiempu. ye una de les consecuencies acumulaes de décades d’emigración, de despoblación, de pérdida de población moza y de precariedá económica. 

This work is licensed under a Creative Commons Attribution 4.0 International License.