L’aprobación recién na Xunta Xeneral d’una reforma llegal pa impedir la entrada de menores de 18 años a los espectáculos taurinos presentóse como un avance históricu. Sicasí, acullá de los titulares, la realidá ye muncho más modesta: les corríes de toros van siguir celebrándose n’Asturies esautamente igual qu’hasta agora.

La midida nun prohíbe la tauromaquia. Nun cuestiona la so esistencia. Nun pon fecha a la so desapaición. Llendase a restrinxir l’accesu de menores y a prohibir la venta d’alcohol nes places. Ye, en definitiva, una reforma tibia y cobarde qu’evita afrontar el verdaderu debate: si una sociedá que se considera avanzada debe siguir amparando espectáculos basaos nel sufrimientu y la muerte d’animales como entretenimientu.

Resulta especialmente llamativo qu’aquellos que güei pretenden presentase como impulsores de cambios fonderos seyan formaciones que, mientres décades, caltuvieron una posición bien distinta. Tanto’l PSOE como Izquierda Xunida, nos munchos años nos que gobernaron l’Ayuntamientu de Xixón, sostuvieron ensin problemes la celebración de corríes de toros na ciudá. La plaza d’El Bibio siguió funcionando con absoluta normalidá baxo gobiernos municipales ‘d’izquierda’, ensin que se promovieren midíes empobinaes a poner fin a una actividá que yá entós yera cuestionada pola mayor parte de la sociedá asturiana.

Agora preténdese vender como un gran avance una regulación qu’acepta, na práutica, la continuidá de la tauromaquia y namás introduz llimitaciones accesories. Si realmente esiste voluntá política pa terminar colos toros, la entruga ye evidente: ¿por qué nun se plantea una estratexa clara pa la so desapaición definitiva?

L’exemplu de Canaries demuestra qu’esisten alternatives. Fae más de trenta años que les corríes desapaecieron del archipiélagu. La sociedá canaria avanzó ensin necesidá de places actives nin feries taurines, y naide puede sostener seriamente qu’ello supunxera una perda económica nin cultural pa les islles. La tauromaquia dexó de formar parte de la vida cotidiana y el debate quedó superáu.

N’Asturies, polo contrario, sigue actuándose como si los toros fueren una tradición propia ya incuestionable. Y equí apaez una cuestión que rara vegada s’aborda: el papel históricu de la tauromaquia como ferramienta d’homoxeneización cultural española.

Les corríes de toros nunca ocuparon n’Asturies el llugar central que tuvieron n’otros territorios del Estáu. La cultura asturiana construyóse sobre referentes distintos, sobre formes propies de sociabilidá, fiesta y rellación col territoriu. Dende los tiempos de Xovellanos puen atopase crítiques a unos espectáculos que se consideraben ayenos a una idea de progresu basada na educación, la illustración y el desenvolvimientu económicu.

La pervivencia de la tauromaquia n’Asturies respuende en bona midida a una llóxica cultural importada, impulsada mientres sieglos dende los centros de poder del Estáu pa reforzar una identidá española uniforme. Los toros funcionaron como ún de los grandes símbolos nacionales promovíos dende Madrid, independientemente del so arraigu real en cada territoriu.

Por eso resulta difícil deslligar el so caltenimientu actual d’una visión colonial de la cultura, según la cual Asturies tendría d’asumir como propies determinaes espresiones culturales españoles pa demostrar la so pertenencia a un marcu identitariu común. Insístese en presentar la tauromaquia como patrimoniu compartíu cuando la sociedá asturiana percíbila como daqué ayeno, impuestu y desconectáu de les manifestaciones culturales que verdaderamente formen parte de la tradición del país.

La reforma aprobada estos díes evita deliberadamente entrar nesa discusión. Permite a los sos impulsores presentase como sensibles a la protección de la infancia mentes esquiven el conflictu de fondu. Ye una solución cómoda: abonda pa consiguir titulares, pero nun tresforma la realidá.

Si la tauromaquia constitúi un problema éticu, como sostienen quien impulsaron la reforma, la conclusión llóxica sedría trabayar pola so desapaición. Si se considera que los menores nun deberíen asistir a estos espectáculos pola violencia que contienen, resulta difícil esplicar por qué esa mesma violencia sigue siendo aceptable pal restu de la población.

Asturies merez un debate más honestu. Non sobre quién pue entrar nuna plaza de toros, sinón sobre si eses places tienen sentíu nuna sociedá que quier construyir el so futuru dende valores propios, alloñaos d’imposiciones culturales heredaes y d’espectáculos que cada vegada cuenten con menos sofitu social. La reforma aprobada nun resuelve esa cuestión. Namás l’aplaza. Y faiolo con una mezcla de tibieza política y cobardía institucional que paecen ser les señes d’identidá del gobiernu y les instituciones sucursalistes que carecemos.

This work is licensed under a Creative Commons Attribution 4.0 International License.