Llucía F. Marqués

La llamada “epidemia” d’abusos sexuales en París nun ye tala, lo que ye ye un andanciu de denuncies que dan voz a una reciella que lleva sieglos silenciada

En París tán investigándose decenes de casos de violencia sexual contra menores nel ámbitu educativu y del arruelu infantil: 84 escueles infantiles, una ventena d’escueles primaries, una decena de guarderíes y polo menos 78 monitores tán baxo investigación por presuntes agresiones o violencies sexuales contra neños y neñes, especialmente neñes.

Dalgunos yá falen d’“epidemia d’abusos”, “fola de denuncies” o inclusive “sicosis colectiva”. El mundu civilizáu mira pa París con una mezcla d’escándalu y superioridá moral: vaya, la ciudá de les lluces, tanto presumir de modernidá y progresu… quién diba dicilo.

Pero non. Nun hai una sicosis. Y probablemente tampoco hai munchos más abusos que primero. Lo que sí hai ye una fola de denuncies y, sobre too, una rotura parcial del silenciu y faelo gracies a la organización de decenes de pas y mas que crearon #MeTooEcole, a min tamién na escuela, una rede de denuncies baxu  # que permitió destapar decenes de casos y dio una vía de denuncia a munchos que nun s’atrevíen a falar. París, a cencielles, va per delantre destapando daqué qu’asocede en toles partes, en tolos tiempos, en toles clases sociales ya en tolos entornos: tamién n’aquellos que se presenten como seguros, educativos o protectores.

Les cifres mundiales respiguen. UNICEF estima que más de 650 millones de neñes y muyeres sufrieron violencia sexual enantes de los 18 años; nel casu de los neños, les estimaciones superen los 400 millones. La prevalencia ye de una de cada cuatro neñes y ún de cada seis neños que carecen abusos sexuales na infancia.

Piensa un momentu. Mira al to alredor. Dos de cada diez persones que ves pudieron sufrir abusos sexuales siendo menores. Y eso son namái les que lo cuenten o les que lleguen a les estadístiques. La inmensa mayoría de los casos permanez oculta mientres años o tola vida.

N’España, más del 40 % de les denuncies por delitos contra la llibertá sexual tienen como víctimes a menores d’edá. Y la mayoría de los abusos sexuales infantiles —en redol al 80 % o más, según distintos estudios— asoceden nel entorno cercanu y de confianza de la víctima: familia, amistaes, escuela, actividaes deportives, arruelu educativu o persones con autoridá sobre la infancia.

L’abusu sexual infantil sigue tando enormemente infradenunciáu. Munches víctimes tarden años en falar; otres nunca lleguen a facelo. Los procedimientos xudiciales pueden allargase más de trés años y la mayoría de les sentencies apenas trescienden a la opinión pública. Sigue siendo un tema fondamente tabú.

N’Asturies, en concretu, siguen esistiendo importantes carencies preventives. Dellos informes señalen que munchos centros educativos nun disponen de protocolos claros frente al acosu y la violencia sexual. Y cuando esisten, la esperiencia demuestra que nun siempres s’apliquen con rigor. Ente otres razones porque, demasiaes vegaes, quien tendría d’activar esos protocolos, ye un agresor, forma parte de les propies cadarmes que protexen al agresor o prioricen la reputación de la institución.

Los rellatos de les neñes y neños parisinos, recoyíos nel #MeTooÉcole, respiguen. Pero sobre too son una llamada d’atención. Hai que falar cola reciella. Y, más que falar, escuchalos. Tar sollertes.