La iniciativa aconceyó a decenes de persones y coleutivos n’apoyu a Palestina y destinó los beneficios a families de Gaza

Ayeri tuvo llugar n’Avilés la Xornada de Solidaridá col Pueblu Palestín, una iniciativa entamada por Asturies Insumisa, Punks escontra l’Apartheid y el chigre L’Argayu, que contó con una destacada participación de persones y coleutivos solidarios con Palestina a lo llargo de tola xornada.

L’actividá arrancó con distintos puestos de material y la presentación de la campaña “Na pue frenar la solidaridá col Pueblu Palestín”, nuna xornada concebida como espaciu de denuncia, conciencia y apoyu al pueblu palestín.

La muestra y xinta de cocina palestina, ellaborada con platos típicos d’esi país, foi ún de los momentos centrales del día y permitió compartir cultura y solidaridá ente les persones asistentes. La propuesta gastronómica tuvo acompañada d’un ambiente revindicativu y de convivencia.

Pela tarde celebróse una charra-alderique sobre les esperiencies de llucha y solidaridá con Palestina. Nella participaron dos moces palestines residentes agora n’Asturies, l’activista propalestina Daniela Cohen y la representante de Punks escontra l’Apartheid, Mónica Doblas, que compartieron reflexones sobre la situación actual del pueblu palestín y les redes internacionales de sofitu.

Nel alderique quedó patente la denuncia del xenocidiu que vive Palestina y defendióse que la devolución de los territorios ocupaos por Israel al so llexítimu dueñu, el pueblu palestín, amás de la reconstrucción del Estáu de Palestina, son elementos fundamentales pa poder avanzar escontra una solución xusta y definitiva.

La xornada remató con un conciertu del cantante de rap asturianu Nahasa, que punxo’l pieslle musical y reivindicativu a una cita marcada pola participación y la solidaridá internacionalista.

Dende la organización recordóse que tolos beneficios recaldaos na xornada van dir destinaos a families palestines residentes en Gaza.

This work is licensed under a Creative Commons Attribution 4.0 International License.