El Salón d’Actos del Palaciu de los Condes de Toreno d’Uviéu va acoyer güei martes 28 d’abril, a les 18.30 hores, la presentación del primer volume del Pequeñu Atles Llingüísticu d’Asturies (PALLA), una nueva obra impulsada pola Academia de la Llingua Asturiana qu’ufre una visión de conxuntu sobre la realidá llingüística’l país.

Los filólogos y académicos Claudia Elena Menéndez y David Guardado van ser los encargaos de dar a conocer esta primer entrega, titulada El mundu animal. Nel actu tamién van participar Xosé Antón González Riaño, presidente de la institución académica, y Vanesa Gutiérrez, conseyera de Cultura, Política Llingüística y Deporte.

El PALLA conviértese nel primer atles xeneral dedicáu de manera específica a la diversidá llingüística d’Asturies. La publicación ye frutu d’un llargu procesu de recopilación y estudiu de datos de campu desendolcáu pola Academia.

La obra inscríbese na tradición de los pequeños atles xeollingüísticos, espublizaciones que presenten una visión cartográfica sintética, acompañada de comentarios y interpretación. D’esta manera, el públicu xeneral va poder atopar una obra visual centrada na bayura lléxica del asturianu en toles sos variantes, ente que les persones especializaes van disponer d’una ferramienta d’interés científicu con aportaciones etimolóxiques, históriques y semántiques.

Les fontes emplegaes proceden de trés grandes bloques d’encuestes trataes con una metodoloxía común: 24 puntos del Atlas Lingüístico de la Península Ibérica (1932-1947), 35 del Atlas Lingüístico de España y Portugal (años setenta) y otros 35 de la campaña d’encuestación realizada pola ALLA en 2025 dientro del Sistema Integral d’Estudios Llingüísticos (SIELLA).

Esti primer volume inclúi 75 mapes y comentarios dedicaos al mundu animal, con separtaos centraos n’insectos y otros invertebraos, aves, reptiles, anfibios y mamíferos. Los conteníos foron escoyíos pol so interés llingüísticu y pola posibilidá de comparar datos ente les distintes fontes.

Amás, la publicación incorpora les claves metodolóxiques necesaries pa interpretar tanto esta entrega como les próximes que completarán el proyectu.

La entrada al actu va ser de baldre hasta completar l’aforu.