La Fundación Asturies XXI vien de presentar una nueva espublización dedicada íntegramente a la Cultura Asturiana de la Sidra, una iniciativa que coincide col primer aniversariu de la declaración de la UNESCO como Patrimoniu Cultural Inmaterial de la Humanidá.
La obra, titulada ¿Qué ye la Cultura Asturiana de la Sidra?, naz col oxetivu d’averar al gran públicu una visión amplia y rigorosa sobre’l mundu sidreru asturianu, entendíu non solo como actividá económica o gastronómica, sinón como un fenómenu social, cultural y identitariu fondamente enraigonáu nel país.
La publicación fai un percorríu polos principales elementos que conformen esti universu: les pumarades, la pañada de la mazana, la ellaboración nos llagares, l’arte d’echar sidra, la vida nos chigres, les fiestes sidreres o la tresmisión oral de saberes y costumes. La espublización cunta col sofitu de la Conseyería de Cultura, Política Llingüística y Deporte.
Dende la Fundación Asturies XXI sorráyase que’l reconocimientu internacional de la UNESCO tien de sirvir agora pa siguir fortaleciendo la conocencia social d’esti patrimoniu vivu y pa tresmitilu a les xeneraciones vinientes.
This work is licensed under a Creative Commons Attribution 4.0 International License.
