El Gobiernu d’Asturies sigue avanzando na autorización de parques de bateríes en suelu urbanu ensin atender la xorreciente contestación social que xeneren esti tipu de proyectos.

Pancarta contra la istalación de parques de bateries

El BOPA vien d’espublizar l’autorización ambiental d’una nueva instalación ente Teatinos y Pontón de Vaqueros, n’Uviéu, formada por 43 contenedores d’almacenamientu enerxéticu. La decisión confirma una dinámica cada vegada más cuestionada: concentrar infracadarmes industriales peligroses en zones habitaes ya ignorar la oposición vecinal.

Na mesma redolada hai previstos o tramitaos seis parques de bateríes que sumen 260 contenedores y 808 MW de capacidá total. La magnitú d’esa concentración resulta difícil de xustificar nun entornu próximu a viviendes, equipamientos deportivos y barrios consolidaos como Fitora, Pontón de Vaqueros o La Corredoria. Lo que se ta construyendo, de facto, ye un corredor industrial nel mediu d’espacios residenciales.

Dende la Coordinadora Ecoloxista d’Asturies, que presentó alegaciones xunto con vecinos afectaos, denuncien que l’Alministración refugó les protestes ensin dar rempuesta real a les esmoliciones plantegaes. La principal ye evidente: la escasa distancia ente los contenedores y les cases. En dellos puntos hai viviendes a menos de cien metros.

Los riesgos nun son menores. Les bateríes industriales de gran tamañu pueden sufrir incidentes graves, como fugues térmiques o incendios difíciles d’apagar, con emisión de gases tóxicos y altamente contaminantes. N’otros llugares del mundu yá se produxeron episodios que demostraron la complexidá d’estos siniestros. Si eso asocede cerca de barrios habitaos, les consecuencies pueden ser mui series pa la salú pública y pal mediu ambiente.

Tamién esmolez la esposición continuada a campos electromagnéticos y l’ausencia d’un alderique públicu seriu sobre los efeutos acumulaos de concentrar delles instalaciones nuna mesma zona. 

El casu d’Uviéu ye namái una amuesa d’un fenómenu más ampliu. N’Asturies yá se conocen decenes de proyectos asemeyaos repartíos por munchos conceyos. La sensación creciente ye que la transición enerxética se ta usando como coartada pa imponer macrocadarmes ensin planificación territorial clara nin participación ciudadana efectiva.

This work is licensed under a Creative Commons Attribution 4.0 International License.