El Conseyu Ministros aprobará güeil’indultu pa les conocíes como Seis de La Suiza, cinco muyeres y un home sindicalistes condergaes tres manifestase nun conflictu llaboral nuna pastelería de Xixón. La decisión pon fin a un procesu xudicial llargu y controvertíu que s’allargó más d’ocho años y que abrió un ampliu alderique sobre los llímites del drechu a la protesta sindical.

Una de les munches concentraciones de sofitu.

Tres d’ocho años de xuicios y cuasi un na cárcele, fina’l calvariu de seis persones que cometieron la imprudencia de defender los drechos llaborales d’una compañera. El que quiso ser un castigu exemplar col que meter mieu al movimientu sindical acabó por convertise nel símbolu de la solidaridá y la xunión de la llucha obrera, recoyendo sofitos de tol país y de fuera d’elli, en 9 años de movilización continua na que s’implicaron tolos sectores de la sociedá

El casu remóntase a 2017, cuando entamó’l conflictu llaboral nel establecimientu. Les persones agora indultaes participaron en piquetes y protestes pacífiques en sofitu d’una trabayadora. Pola so actuación, fueron finalmente condergaes a tres años y mediu de prisión por “un delitu continuáu de coacciones graves” y por un delitu “contra l’Alministración de Xusticia por obstrucción”.

Tres la conderga, presentaron recursos, pero’l Tribunal Supremu acabó ratificando la sentencia dempués d’un procesu xudicial que se prolongó más d’ocho años. Finalmente, les condergaes ingresaron en prisión va cerca d’un añu.

El camín hasta l’indultu nun foi nin rápidu nin cenciellu. En xunu de 2025, el Gobiernu del Principáu solicitó formalmente la midida de gracia por «razones humanitaries». Sicasí, nun foi hasta cuasi un añu más tarde cuando’l asuntu llegó al orde del día del Consejo de Ministros español, evidenciando la tardanza na tramitación.

Mientres esti tiempu, el casu convirtióse nun símbolu pa una parte importante del movimientu sindical y social. Desenvolvióse una campaña de sofitu caltenida nel tiempu, con movilizaciones y pronunciamientos d’organizaciones sindicales, coleutivos sociales, partíos políticos y representantes del mundu de la cultura. El procesu xeneró, amás, un alderique ampliu sobre la criminalización de les movilizaciones llaborales.

La propuesta d’indultu parte del Ministeriu de Trabayu y supon la anulación de les penes de prisión que pesaben sobre les sindicalistes.

Cola decisión que se formaliza güei, ponse fin a un procesu xudicial que marcó un murniu precedente  represivu y que foi siguíu con atención tanto a nivel nacional como internacional.