Andecha Astur y Esquerra Republicana de Catalunya (ERC) reforciaron esti martes en Barcelona les sos rellaciones polítiques nun alcuentru marcáu pol intercambiu de valoraciones y la coincidencia en posicionamientos sobre la situación actual, tanto a nivel estatal como internacional.

La delegación d’Andecha Astur, formada por Carme Pérez y Marcos Fernández, miembros de la Xunta Executiva, aconceyó con representantes d’ERC, ente ellos Oriol López, secretariu xeneral axuntu y diputáu nel Parlamentu, y Adrià Guevara, responsable de rellaciones internacionales. Nel marcu de la xunta, los representantes asturianos tuvieron tamién ocasión de saludar a Josep Rull, presidente del Parlament.

El alcuentru valió pa compartir diagnósticos sobre les realidaes nacionales d’Asturies y Catalunya, poniendo en común los retos políticos, sociales y culturales que carecen dambos territorios. Amás, abordóse la situación política nel Estáu, nun contestu marcáu pola evolución del escenariu institucional y les perspectives del próximu ciclu electoral.

A nivel internacional, dambes organizaciones amosaron la so preocupación pol actual contestu y polos riesgos del avance de la drecha y la ultradrecha, asina como pola deriva militarista, qu’alerten podría tener un impactu direutu nes condiciones de vida de la ciudadanía, especialmente nes clases trabayadores. Nesti sen, defendieron el refuerzu de los drechos sociales, el compromisu cola paz, la soberanía de los pueblos y el respetu al drechu internacional, apostando pola diplomacia, la negociación y los alcuerdos como ferramientes clave pa la estabilidá.

Asina mesmo, destacaron la importancia de venceyar esfuercios ente les fuercies soberanistes d’izquierda pa avanzar na defensa de los drechos sociales y nacionales y na construcción de modelos políticos que reconozan la pluralidá de los pueblos y el so derechu a decidir.

Andecha Astur y ERC caltienen dende hai tiempu una rellación política estable y formen parte d’Agora Repúbliques, coalición con representación nel Parllamentu Européu, lo que refuerza los espacios de cooperación ente dambes formaciones.