La sierra de Peñamayor volverá esti fin de selmana a recibir a cientos de corredores col Traíl Villa de la Sidra, una carrera de monte que percorre una parte importante d’esti paisaxe emblemáticu del centru d’Asturies. La defensa d’esti espaciu natural y humanu tará presente nel eventu

La Plataforma Salvemos Peñamayor lleva años movilizándose pa protexer la sierra frente al proyectu mineru que la amenaza. El colectivu alerta de que Peñamayor nun ye solo un espaciu natural, sinón un paisaxe habitáu, con brañes, praderíes, monte comunal y actividá ganadera que forma parte fundamental de la vida y la identidá del territoriu.

Nos últimos meses, la plataforma asegura que detectó incumplimientos venceyaos col permisu mineru, amás d’una situación que califiquen de “preocupante inacción” per parte de l’alministración ante estos fechos. Por esti motivu, el colectivu decidió volver alzar la voz coincidiendo cola celebración del traíl, un eventu que pon el focu precisamente na riqueza paisaxística y cultural de la sierra.

Dende la plataforma recuerden que cualquier xestu de visibilización pue ayudar a defender Peñamayor. Por eso animen a los participantes y al públicu a llevar la camiseta técnica de Salvemos Peñamayor y/o a compartir imáxenes nes redes sociales col hashtag #salvemospeñamayor.

La organización ciudadana va tener presencia directa nel eventu. El sábadu, coincidiendo col repartu de dorsales, instalarán una mesa informativa, onde se podrá conocer de cerca la situación actual del conflictu mineru y les iniciatives en marcha. El domingu, durante la carrera, tamién van tar presentes na zona, reforzando la campaña de sensibilización. Ye avezao que’l presidente Adrián Barbón acuda a esta carrera y coincida coles protestes. Ye avezao tamién que los ignore.

La plataforma insiste en que la defensa de Peñamayor ye una causa colectiva y recuerda que cada xestu cuenta pa proteger esti espaciu que, como demuestra’l propiu traíl, sigue siendo un paisaxe vivu y compartíu.

Nel Dos Santos