Cuatro persones tán siendo investigaes pol corte de la A-8 en Castropol nuna xornada de movilización agraria contra la PAC y l’acuerdu UE-Mercosur
La Guardia Civil investiga a cuatro persones pola so presunta participación nel corte de la Autovía del Cantábricu (A-8) el pasáu 29 de xineru, a la altura de Castropol, nuna actuación que se produxo nel contextu de les movilizaciones agraries y ganaderes convocaes n’Asturies y nel conxuntu del Estáu pa reclamar meyores condicions pal sector primariu.
El corte de la vía efectuóse per mediu d’una barricada formada con neumáticos y paxa, que provocó la interrupción del tráficu durante un tiempu determináu. Los fechos tan siendo investigaos como presuntos delitu de desórdenes públicos y contra la seguridá vial, según informaron fontes oficiales.
L’actuación tuvo llugar nuna xornada marcada por protestes del campu, con concentraciones, marches y cortes de tráficu en distintos puntos, nel marcu de les reivindicaciones del sector ganaderu contra los recortes de la Política Agraria Común (PAC) y l’acuerdu comercial ente la Unión Europea y Mercosur, que, según denuncien les organizaciones agraries, pon en peligru la viabilidá de les esplotaciones.
Dende’l sector ganaderu, la investigación xudicial interprétase como un nuevu episodiu de criminalización de la protesta social. Los profesionales del campu recuerden que les movilizaciones surden tres meses d’alertes ensin respuesta efectiva por parte de les alministraciones y reclamen que se respete’l drechu a protestar frente a decisiones polítiques que afecten direutamente al so mediu de vida.
Les organizaciones agraries insistieron n’ocasiones anteriores en que les movilizaciones del sector desendólquense como caberu recursu ante una situación que califican de llende, marcada pol aumentu de costes, la baxada de precios en orixe y la competencia deslleal derivada d’alcuerdos internacionales.
Mentantu, el procesu xudicial sigue’l so cursu, nun contestu nel que los ganaderos asturianos avisen de que van siguir movilizándose pa defender los sos drechos y la supervivencia del mediu rural, reclamando soluciones polítiques en cuenta de respuestes punitives.
Llucía F.M.
This work is licensed under a Creative Commons Attribution 4.0 International License.
