Dende’l sector denuncien que, tres el traspásu de la xestión de les escueles infantiles a l’Alministración autonómica, nun se produxeron les meyores prometíes nin se resolvieron problemes estructurales como la precariedá contractual o la falta de reconocencia profesional

Aula d’educación infantil

El conflictu llaboral nes escueles infantiles d’Asturies vive un nuevu episodiu de tensión dempués de qu’un grupu de trabayadores del ciclu educativu de 0 a 3 años decidiera zarrase esti miércoles na Conseyería de Facienda y Xusticia pa presionar a l’Alministración autonómica y reclamar avances reales nes sos demandes.

Dende’l sector denuncien que, dende que se produxo’l traspásu de la xestión de les escueles infantiles a l’Alministración del Principáu, nun se cumplieron les meyores que se prometieren nel so momentu. Llueu d’esi cambéu competencial, aseguren que nun se resolvieron los problemes estructurales que yá veníen arrastrando, como la precariedá contractual, la alta temporalidá o la falta de reconocencia profesional, y que la situación llaboral sigue siendo, na práctica, la mesma.

L’acción forma parte d’un procesu de movilización que’l colectivu vien protagonizando dende va meses, ante la falta de soluciones a una riestra de reivindicaciones que consideren fundamentales pa dignificar la so situación llaboral. Enantes del empreslle, les trabayadores rexistraron escritos dirixíos a la Dirección Xeneral d’Emplegu Públicu, a la Conseyería d’Educación y a la Vicepresidencia del Principáu, amás de participar en concentraciones frente a la Xunta Xeneral.

Ente les principales reclamaciones del colectivu atópase la recategorización profesional al grupu B, pa que la so clasificación llaboral s’axuste a la formación y responsabilidaes reales del puestu; la estabilización de les places interines, nuna rede marcada por un altu grau de temporalidá; y la modificación del calendariu llaboral, col envís d’equiparalu al del restu de les etapes educatives.

Amás, les trabayadores reclamen la garantía d’una hora diaria pa funciones fora del aula, como coordinación, preparación de materiales o atención a families, y denuncien que n’ocasiones se-yos encomienden xeres que nun correspuenden a la so cualificación profesional. Tamién señalen la falta de recursos materiales nos centros, que n’algún casu tienen de sufragar del so propiu bolsu.

Según los sindicatos convocantes, les últimes xornaes de fuelga y protesta tuvieron un siguimientu mayoritariu nel conxuntu de la rede d’escueles infantiles, anque dende l’Alministración rebáxense estes cifres. Mientres nun se produzcan avances concretos na negociación y nun se materialicen les meyores prometíes tres el traspásu de competencies, el colectivu nun descarta caltener les movilizaciones y intensificar les acciones reivindicatives.

Susana Sela

This work is licensed under a Creative Commons Attribution 4.0 International License.