Un xulgáu de lo Social declara nulu un de los despidos realizaos pola empresa Saint-Gobain tres el preslle de la división Sekurit na so factoría d’Avilés. La resolución xudicial, conocida estos díes, pon de manifiestu que, inclusive en procesos de zarru industrial, les empreses tán obligaes a cumplir escrupulosamente la llegalidá laboral y a respetar los drechos de los trabayadores.
El despidu anuláu forma parte del procesu d’extinción d’emplegu que siguió al anunciu del cese d’actividá de Sekurit, pol treslladu a Marrruecos de la producción, una decisión que supunxo la perda de decenes de puestos de trabayu y que xeneró una fonda contestación social y sindical na contorna d’Avilés. La sentenza nun invalida’l conxuntu del procesu, pero sí estima la demanda presentada por un trabayador concretu, al considerar que nel so casu nun se xustificó correutamente la midida empresarial.
La declaración de nulidá implica que’l xulgáu apreció la vulneración de drechos protexíos pola normativa llaboral. Nesti tipu de casos, la llei afita que’l despidu nun pue producir efeutos y que la empresa ta obligada a reponer la situación anterior, lo que pue suponer la readmisión del trabayador y l’abonu de los salarios dexaos de percibir dende la fecha del cese.
Dende’l puntu de vista xurídicu, un despidu nulu ye la calificación más grave que pue recibir una decisión empresarial d’esti tipu, y supón una llamada d’atención clara a les empreses sobre la necesidá de respetar los procedimientos y les garantíes llegales, entá cuando se trate de procesos de reestructuración o preslle d’instalaciones.
El fallu cobra especial relevancia nel actual contestu d’incertidume industrial n’Asturies, onde delles empreses recurren a preslles o desllocalizaciones alegando causes productives o económiques. La resolución xudicial recuerda qu’estes causes nun esimen del cumplimientu de la llei y que cada despidu pue y debe ser analizáu de manera individual.
Amás, el casu de Sekurit refuerza un mensaxe clave pa la clase trabayadora: denunciar ye importante y pue dar resultaos. Anque non tolos despidos acaben siendo declaraos nulos, el control xudicial de les decisiones empresariales ye una ferramienta fundamental pa defender drechos y pa evitar abusos.
This work is licensed under a Creative Commons Attribution 4.0 International License.
