La reciente aprobación d’una Proposición Non de Llei (PNL) contra l’acuerdu ente la Xunión Europea y Mercosur por parte de la Xunta Xeneral del Principáu d’Asturies nun pasa de ser un xestu simbólicu ensin nengún efeutu real. Nin el Gobiernu del Principáu nin el so parllamentu tienen competencia dalguna en materia de comerciu internacional, una competencia esclusiva de la XUnión Europea y del Estáu español.

Dicho d’otra miente: da igual lo que s’apruebe n’Uviéu. L’acuerdu, si se ratifica, va aplicase igual, y el Principáu va llimitase —como siempres— a cumplir colo que-y manden dende enriba, ensin capacidá de decisión, negociación nin derechu a vetu.

Esta PNL nun modifica nenguna política, nun condiciona nenguna votación y nun activa nengún mecanismu real de defensa del sector primariu asturianu. Ye, nel meyor de los casos, retórica parllamentaria; nel peor, una maniobra p’aparentar oposición ensin asumir la realidá del marcu autonómicu nel que mos atopamos.

Convien recordalo ensin rodeos: el Principáu d’Asturies ye una institución impuesta dende Madrid, creada nel procesu autonómicu ensin que la ciudadanía asturiana pudiera votar si quería o non esi modelu. Nunca se mos dio la posibilidá d’escoyer ente autonomía, autogobiernu real o otres fórmules polítiques. L’arquiteutura institucional vino dada, y con ella un repartu de competencies decidíu tamién fuera d’Asturies y de los intereses del pueblu asturianu.

Les competencies asignaes al Principáu, llueñe de garantizar capacidá política efectiva, raspien en munchos casos el ridículu: xestión secundaria, dependencia presupuestaria, marxe de maniobra mínimu y nenguna influencia nos asuntos estratéxicos que afecten de manera directa a la economía y al futuru del país, como ye’l comerciu internacional o la protección del sector primariu frente alcuerdos globales.

Asina, mientres los ganaderos y productores asturianos encaren les consecuencies reales del posible impautu de Mercosur, el Principáu aprueba resoluciones que nun obliguen a nada nin a naide. Nun negocia, nun decide y nun pinta nada. Y esa ye la cuestión de fondu que se quier evitar: la irrelevancia política d’una institución ensin soberanía nin poder real.

Más que PNL simbóliques, lo que precisa Asturies ye un debate seriu sobre quién decide, dende onde se decide y al serviciu de quién. Lo demás ye escenografía parllamentaria.

This work is licensed under a Creative Commons Attribution 4.0 International License.