Cartelu de la convocatoria de concentración
Esti vienres 16 de xineru, a les 12 del mediudía, ta prevista una concentración simbólica frente a la sede de Hunosa, asitiada na Avenida de Galicia númberu 44, n’Uviéu, en protesta pol proyeutu de quema de residuos na central térmica de la Pereda, en Mieres.
iniciativa pretende visibilizar la oposición social a una actuación que, según denuncien colectivos vecinales y sociales, supondría un riesgu pa la salú de la población de los valles colindantes.
La protesta surde nun contestu marcáu pola preocupación polos impactos ambientales y sanitarios derivaos del usu del denomináu CSR (combustible sólidu recuperáu) como fonte enerxética. Dende la plataforma ciudadana contraria a la incineradora sostiénse que esti material nun pue equiparase a la biomasa, y que la so quema xenera emisiones que nun resulten inocues pal aire que respira la población.
Les cuenques mineres, recuerden, tienen una memoria colectiva fondamente marcada pola contaminación industrial. Xeneraciones enteres convivieron col fumu de les chimenees, que si bien dieron trabayu, tamién dexaron una fonda fola de problemes de salú. Esa esperiencia, señalen, fai que la ciudadanía seya especialmente sensible ante proyeutos que supongan volver a situar a la población xunto a focos d’emisión contaminante.
Les crítiques tamién s’estienden a la falta de claridá nos informes técnicos y a los cambeos nos criterios esplicaos a lo llargo del procesu, amás de les duldes sobre’l cumplimientu efectivu de los llímites d’emisión y los controles anunciaos. Nun se trata, afirmen, d’un refugu al desarrollu nin a la creación d’empléu, sinón d’esixir alternatives que nun repitan modelos que yá demostraron les sos consecuencies negatives. Depués de carecer les llacerioses consecuencies económiques de la descarbonización nun pue pedis-yos a los asturianos qu’acueyan otru mediu de producción igualmente contaminante.
Pa estos colectivos, quemar basoria nun pue presentase como una solución de transición ecolóxica nin como un avance ambiental, sinón como una vuelta a esquemes del pasáu que comprometen el futuru. La defensa del derechu a un aire llimpiu y a la protección de la salú pública considérase, nesti sentíu, una cuestión de responsabilidá social y democrática.
La concentración d’esti vienres pretende, asina, reabrir l’alderique públicu sobre’l modelu enerxéticu y de xestión de residuos que se quier impulsar n’Asturies, poniendo nel centru les consecuencies reals pa les persones que viven nel territoriu.
Nel Dos Santos
This work is licensed under a Creative Commons Attribution 4.0 International License.
