Abanderáu asturianu en Lorient
Asturies va llevar pela primer vegada al Festival Intercélticu de Lorient a los ganadores del II Premiu Obdulia Álvarez La Busdonga d’Asturianada. La iniciativa supón un pasu decisivu pa la proyección internacional de la canción tradicional asturiana nel principal escaparate global de les cultures cèltiques, un eventu que congrega cada añu a centenares de miles de visitantes
L’alcuerdu algamáu cola organización del festival va permitir que los intérpretes premiaos s’integren na delegación oficial asturiana. Dende la Conseyería de Cultura y cola coordinación del representante del festival n’Asturies, trabáyase yá pa venceyar esta collaboración y da-y continuidá en próximes ediciones.
La edición d’esti añu va contar con una representación bien significativa del oriente y del centru d’Asturies. Na categoría femenina, el premiu recayó n’Alicia Villanueva, de Bimenes; ente la xente moza, el gallardón foi pa Néstor Díaz, de Llanes. Los dos van llevar la voz de los sos conceyos a un escenariu internacional de primer orde, amosando la vitalidá y la tresmisión xeneracional de la tonada. Na categoría masculina, el xuráu reconoció a Esteban Verdeja, intérprete procedente de Cantabria.
El Premiu Obdulia Álvarez La Busdonga d’Asturianada ta dotáu con 15.000 euros, repartíos en trés categoríes: femenina y masculina, con 6.000 euros caúna, y moza, con 3.000 euros, destinada a cantadores menores de 22 años. Na valoración, el xuráu tien en cuenta cuestiones como la entonación, l’afinación, la calidá vocal, la complexidá de los estilos, la ornamentación y el cuidu llingüísticu.
Con esti certame ríndese homenaxe a Obdulia Álvarez, una de les grandes voces del sieglu XX, y reafirma la tonada como un patrimoniu vivu. Declarada Bien d’Interés Cultural de calter inmaterial en 2015, la asturianada sigue atopando nueves voces y escenarios dende los que proyectase al mundu, agora tamién dende Lorient.
Susana Sela
This work is licensed under a Creative Commons Attribution 4.0 International License.
