Esta tarde a les 20:00 h na Casa de Cultura de Mieres va cellebrase la presentación y proyeición del curtíu documental Tolos fueos, el fueu, una obra del cineasta mierense Diego Flórez que trata sobre la quema de basoria ya’l proyectu de incineración na térmica de La Pereda, cuestión que ta suscitando preocupación social y ambiental n’Asturies.
La obra de Flórez, que tien una duración de poco más de 14 minutos, explora l’impactu social y ambiental d’un proyectu que xenera debate n’asturies y plantea reflexones sobre l’usu del fueu, la caltenibilidá ya’l futuru de les cuenques mineres.
La quema de basoria en La Pereda, en Mieres, ta venceyada al proyectu d’utilizar la central térmica pa incinerar combustible deriváu de residuos (CDR), que ye a cencielles basoria previamente tratada. La idega ye quemar esos residuos nes mesmes calderes onde anantes se quemaba carbón, como alternativa pa dar salida a los residuos y caltener l’actividá industrial na zona. Ello ye, seguir quemando combustible altamente contaminante, lo qu’evidencia otra vuelta la falacia de la ‘descarbonización’ verdi qu’utilizaron pa presllar les mines y de pasu el mercáu llaboral de les cuenques.
L’alderique xurde poles esmoliciones sobre les emisiones contaminantes a l’aire, l’impactu na calidá del aire nel valle y los posibles efectos na salú de la población, amás de la discusión sobre si esti modelu ye compatible cola transición enerxética y el futuru caltenible de les cuenques asturianes.
L’eventu incluirá una charra posterior col director, Diego Flórez onde’l públicu va poder comentar y aldericar sobre les imáxenes y los mensajes que presenta’l curtíu. La proyección forma parte d’una iniciativa cultural y social pa dar visibilidá a problemátiques medioambientales que yá tán presentes nos debates vecinales.
Tolós fueos, el fueu foi reconocíu con el Premio del Juráu Xoven al Meyor Curtometraxe na Seición Oficial del Festival Internacional de Cine de Xixón (FICX), un importante galardón que destacó la calidá y la forza del so retratu documental.
Susana Sela
This work is licensed under a Creative Commons Attribution 4.0 International License.
