Ún de los aspeutos que puen influir na calidá de vida de los pacientes con enfermedaes reumátiques ye la sexualidá. La prevalencia de los problemes sexuales nes enfermedaes reumátiques puede variar ente un 36% y un 70%, y aumenta cola duración de la enfermedá.
Les causes son diverses. Problemes físicos o emocionales, alteraciones hormonales, dellos tratamientos y dificultaes nes rellaciones de pareya, puen contribuyir a una vida sexual menos activa y, a menudo, menos satisfactoria.
Nas fases d’alta actividá puede esistir una mengua del deséu sexual por mor del dolor crónicu, la fatiga y la rigidez. Per otru llau, la alteración de la imaxe corporal por culpa de les deformidaes puede carrexar una perda d’autoestima y una disminución de la satisfacción sexual. El dolor durante les rellaciones, la disfunción eréctil y la dificultá en determinaes posiciones son cuestiones físiques rellacionaes tamién cola sexualidá que puen acabar nuna perda d’interés y nuna mengua de la frecuencia de les rellaciones sexuales.
Los problemes sexuales nos pacientes con artritis reumatoide rellacionáronse cola duración de la enfermedá, la perda de movilidá y el dolor articular. La disfunción eréctil nos homes correllaciónase cola actividá o severidá de la enfermedá, el dolor y la fatiga. Nes muyeres añádese la depresión, qu’afeuta al deséu sexual, al orgasmu y a la satisfacción sexual.
La falta comunicación y de comprensión de la enfermedá por parte de la pareya o, n’ocasiones, una atención escesiva por mieu a facer dañu físicamente, puede ser otru aspeutu que dificulte les rellaciones sexuales.
El tema de la sexualidá nun suel trate davezu nes consultes nin tampoco se fai referencia a ello nos cuestionarios utilizaos pa valorar la calidá de vida rellacionada cola salú. Les enfermedaes reumátiques nun tendríen de suponer nengún torgu pa caltener unes rellaciones sexuales satisfactories. Debería recomendase planiar l’actividá sexual d’alcuerdu col deséu y la condición física. Ye fundamental la comunicación cola pareya tocante a los sentimientos, deseos, xuegos y necesidaes sexuales.
Como conseyos práuticos, deberíen evitase les temperatures fríes tomando una ducha o bañu caliente, o utilizando una manta eléctrica pa caltener una temperatura agradable. Ye afayadizo tar descansaos y relaxaos, tomar la medicación pal dolor 30 minutos enantes de tener rellaciones y utilizar un xel llubrificante íntimu pa menguar les molesties durante’l coitu. Hai d’evitar el tabacu y l’alcohol. Puen recomendase aquelles posiciones sexuales más eficaces contra’l dolor y recordar la importancia de la confianza nos profesionales de la salú.
La parte más atractiva del cuerpu ye la mente, y l’actitú yelo too.
- ¿Qué ye l’Artritis Reumatoide?
- ¿Cuáles son les causas?
- Síntomes d’Artritis Reumatoide
- ¿Cuántu dura un biltu d’AR?
- ¿Cuándo tengo de consultar al reumatólogu/a?
- ¿Cómo se diagnostica l’artritis reumatoide?
- ¿Cúrase l’Artritis Reumatoide?
- ¿Pue tenese una aceptable calidá de vida y evitar la discapacidá?
- Pue llograse l’embaranzu teniendo AR
- Pue facese exerciciu teniendo AR
- Sexu y artritis reumatoide
- Tratamientu de l’Artritis Reumatoide
- Control y Prevención de l’Artritis Reumatoide
- ¿Que són les asociaciones de pacientes? ¿Pa qué sirven?
This work is licensed under a Creative Commons Attribution 4.0 International License.
