Los “planes de viabilidá y reestructuración” anunciaos por Duro Felguera inclúin fondos cambeos operativos nel so furrulamientu y cadarma qu’impliquen el despidu de media plantía, el perdón dafechu de la delda empresarial y la so venta a capital foriatu
L’empresa va crear una nueva sociedá, denomada MidCo, de la que van depender les dos principales llinies d’actividá del grupu: la d’EPC (proyeutos d’inxeniería “llave en man”, qu’inclúin diseñu, suministru y construcción) y la de servicios.
Per otru llau, la compañía anunció la venta de les filiales Felguera Tecnoloxíes de la Información (FTI) y DF Intelligent Systems, y la liquidación de DF Oil & Gas, DFOM Biomasa y DF Green Tech, esta cabera la cacarexada sociedá d’enerxíes renovables na que la direición anterior depositare grandes esperances, pero que nun llogró remontar.
Dende Andecha Astur calificaron estos movimientos non como una reestructuración, sinón como un auténticu espoliu industrial. “Nun falamos d’una reestructuración: falamos de media plantía na cai, del perdón total de la delda empresarial y de la venta d’una empresa histórica asturiana a capital foriatu. Si’l Gobiernu tien 100 millones pa rescatar fondos y autopistes, tamién podría tener esos mesmos 100 millones pa comprar Duro Felguera y convertila nuna empresa pública, venceyada a Navantia y al sector naval estatal”, señalaron.
La organización apuntó tamién que cola reapertura d’una o dos mines públiques podría abastecese’l carbón precisu pa producir aceru propiu pa Navantia, ensin depender de multinacionales. “Eso ye soberanía industrial asturiana, eso ye planificación económica y defensa de la clas trabayadora”, apuntaron; “lo demás —les quites, los despidos y les ventes a fondos— nun ye más que otra entrega d’Asturies a intereses ayenos”.
Andecha Astur aprofitó la ocasión pa reclamar el control públicu d’empreses estratéxiques, la intervención del Gobiernu Asturianu pa garantizar emplegu y un plan real de reconstrucción industrial con criteriu social y ecolóxicu.
“Si queremos una Asturies viva, tien de producir pa sí mesma, non pa los mercaos”, concluin.
Nel Dos Santos
This work is licensed under a Creative Commons Attribution 4.0 International License.
