Decenes de persones aconceyaron ayeri pa rindir sintíu homenaxe a los héroes de la Revolución Asturiana d’Ochobre del 34, nuna xornada marcada pola emoción, la memoria y el compromisu col futuru d’Asturies na que’l conflictu palestín tuvo tamién bien presente
Nos dos actos recalcóse la emportancia de deprender del pasáu pa, nel presente, algamar la mesma xunidá d’aición que fixo posible aquel movimientu obreru que cambéu la historia del país.
“El meyor homenaxe que-y podemos facer a los Mártires de Carbayín ye calteneer viva la so llucha, siguir puxando por una Asturies del pueblu trabayador y pal pueblu trabayador”, señalóse dende la organización.
El primer actu tuvo llugar nel cimenteriu de Carbayín, onde s’alza’l monumentu que rinde homenaxe a los 24 homes asesinaos pol exércitu español una bones ya se firmare’l pautu col que finare la Revolución, xabazmente incumplíu pol Gobiernu de la República Española.
Na so intervención, Llucía F. Marqués recordó que los revolucionarios “teníen nidio dos coses: que yeren asturianos y que yeren clas obrera”, y añadió:
“L’aprendizaxe que mos dexó la Revolución d’Ochobre del 34 foi la alianza obrera y la necesidá d’axuntar fuercies pa facer les coses en comuña, comu pueblu. Y otru igual d’emportante: la necesidá d’escoyer Asturies comu marcu específicu de llucha de la clas obrera”.
Darréu, los actos desplazáronse al cimenteriu de Pando, onde reposen los restos de Belarmino Tomás, Presidente de l’Asturies independiente.
Ellí, Marcos A. Fernández fixo una intervención sentida y combativa, entamando con un clamor pola solidaridá col pueblu palestín: “Esta ye tamién la bandera d’Asturies”, afirmó, alzando la bandera palestina ente los aplausos del públicu.
Na so intervención, Fernández fizo un llamáu a deprender de la hestoria y de los héroes del 34 y del 37, reclamando la independencia d’España y la tan necesaria xunidá d’aición del pueblu asturianu, como vía pa construyir una Asturies soberana y socialmente xusta.
L’actu presllóse, comu ye vezu, cola interpretación de “La Flor del Agua”.
This work is licensed under a Creative Commons Attribution 4.0 International License.
