La campaña #OchobreContraLaProbitú reivindica’l papel del esporte como ferramienta d’inclusión y xusticia social
El 17 d’ochobre cellébrase’l Día de la Erradicación de la Probitú, una xornada que convida a reflexonar y actuar conxuntamente pa construyir una sociedá más xusta ya inclusiva. Nesti contestu, la campaña #OchobreContraLaProbitú busca sensibilizar sobre la realidá de les persones en situación de falta de medios y esclusión social, promoviendo la participación ciudadana y l’alcuentru colectivu frente a una de les mayores desigualdaes del nuesu tiempu.
Dende la organización impulsora d’esta iniciativa desendólquense, a lo llargo del mes, actividaes y aiciones destinaes a visibilizar estes problemátiques, fomentar la implicación de la comunidá y promover polítiques que contribuyan a amenorgar la probitú n’Asturies. L’oxetivu ta nidiu, xunir esfuercios, compartir información y fortalecer la llucha dende una perspectiva de drechos y xusticia social.
Un de los exes d’esta campaña ye’l papel del esporte como ferramienta d’igualdá y tresformación social. Dende la organización destácase la so capacidá pa derribar barreres sociales y culturales, creando espacios onde toles persones puedan participar, ensin importar l’orixe, el xéneru o la situación económica.
La práutica esportiva en comunidá —despliquen— favorez la cohesión social, l’alcuentru y la collaboración, construyendo redes d’apoyu que fortalez la inclusión. Amás, l’esporte impulsa l’autoestima, la confianza y la capacidá de superación de les persones en situación de vulnerabilidá, convirtiéndose nun espaciu onde la diversidá se celebra y tresfórmase en fortaleza.
Ca partíu, cada carrera o entrenamientu son, asina, oportunidaes pa promover valores d’equidá, solidaridá y xusticia social.
La presentación oficial de #OchobreContraLaProbitú va celebrase esta tardi, a les 18:00 hores, nel salón d’actos de la Cocina Económica de Xixón.
Nel actu van participar representantes del FC Sporting, Lobas Global Atac Uviéu de balonmanu, Solimar Hockey Club y Belenos Rugby, que s’axunten a la campaña amosando’l so sofitu dende l’ambitu esportivu. Tamién van tar presentes Elena Rúa, presidenta d’EAPN-AS, y Ignacio Blanco, presidente de la Cocina Económica, xunto col so direutor, Rafa Piñera.
Susana Sela
This work is licensed under a Creative Commons Attribution 4.0 International License.
