SUATEA denuncia’l desagospiu de la Escuela d’Arte d’Avilés y defiende’l Palaciu de Camposagrado como padremuñu de la educación pública. El sindicatu alerta de que la cesión del Palaciu de Camposagrado a la universidá privada Nebrija supón un ataque direutu a la enseñanza pública y un espoliu del so padremuñu cultural y educativu.

El Sindicato Unitariu Autónomu de Trabajadores de la Enseñanza d’Asturies (SUATEA) denunció la decisión d’espulsar al alumnáu y al profesoráu de la Escuela Superior d’Arte del Principáu, que dende va décades vien desendolcando la so llabor educativa nel Palaciu de Camposagrado. El edificiu, símbolu históricu y cultural d’Avilés, pretende agora cederse a la Universidá privada Nebrija, nun movimientu que’l sindicatu califica de “ataque frontal a la educación pública” y de pasu más na so privatización y mercantilización.

Pa SUATEA, la espulsión d’estudiantes y docentes pa favorecer a una institución privada ye inaceptable y vulnera’l drechu a una enseñanza pública, accesible y de calidá. “El Palaciu de Camposagrado nun pue convertise en moneda de cambéu pa intereses privaos: ye padremuñu históricu y cultural d’Avilés y tien de siguir al serviciu de la comunidá educativa”, señalaron.

El sindicatu denuncia tamién la falta de tresparencia y participación nesti procesu, lleváu alantre ensin cuntar cola comunidá educativa y ensin garantizar que’l treslláu de la Escuela d’Arte al PEPA pueda facese con espacios, recursos y condiciones dignes. La improvisación y la opacidá, denuncien, xeneren incerteza ente’l alumnáu y el profesoráu y amuesen la ausencia d’un proyectu sólidu pa reforzar lo público.

Por too ello, SUATEA esixe la paralización inmediata de cualesquier midida que suponga’l desagospiu de la Escuela d’Arte, reclama que’l Palaciu de Camposagrado siga siendo un espaciu públicu al serviciu de la enseñanza y demanda al Gobiernu d’Asturies que abandonen la política de favorecimientu a les universidaes privaes en perxuiciu de la pública.

“Enfrente’l espoliu de lo común y l’avenida de la privatización, reafitámonos nel nuesu compromisu cola defensa d’una educación pública, de baldre y de calidá, como padremuñu irrenunciable de la ciudadanía”, afirmaron. SUATEA llama a la movilización social en defensa de la Escuela d’Arte d’Avilés y de la enseñanza pública asturiana.

Susana Sela

This work is licensed under a Creative Commons Attribution 4.0 International License.