Dende entamos de xunu y hasta finales de setiembre, personal del Centru Oceanográficu de Xixón y del Institutu Español d’Oceanografía (IEO-CSIC) participa na campaña Physalia Asturias, centrada nel estudiu de la carabela portuguesa (Physalia physalis).
La iniciativa entámase dientro del proyectu PHYSALIA – Evolución de la navegación biolóxica a vela, coordináu conxuntamente pola Universidá d’Uviéu y el propiu centru del IEO-CSIC.
L’oxetivu principal ye afondar nel conocimientu de la bioloxía y ecología d’esta especie pa entender qué factores determinen la so distribución y abondancia, y poder asina predecir con más precisión cuándo y ónde pue apaecer nes nuestres costes. “La carabela portuguesa ye ún de los organismos más emblemáticos del neuston, y tamién ún de los que más preocupación xenera pola so potente picadura. Conocer cómo y por qué lleguen a les nuestres costes ye clave pa prevenir riesgos”, desplica Fernando Taboada, científicu titular del Centru Oceanográficu de Xixón y ún de los investigadores principales del proyectu.
El trabayu de campu inclúi la llocalización, recuperación y caltenimientu temporal d’exemplares, tanto en mar abiertu como en zones costeres. Esta llabor fai posible gracies a la collaboración de los grupos de salvamentu del plan SAPLA, coordinaos pol 112 Asturies, amás del sofitu del Observatoriu Marín d’Asturies y la Escuela Superior de Marina Civil de la Universidá d’Uviéu.
Los exemplares que se recueyen y se caltienen en condiciones controlaes sirven pa facer esperimentos sobre la so estructura poblacional y patrones de desplazamientu. Pa ello,’l proyectu cuenta col asesoramientu del BIOPARC Acuariu de Xixón, que pon a disposición instalaciones especializaes y esperiencia nel caltenimientu d’organismos marinos.
La carabela portuguesa ye común n’agues cálides d’océanu abiertu, pero a vegaes los vientos y corrientes arrástrenla hasta la mariña. La so presencia nes sableres supón un riesgu pol so venenu potente.
Nos últimos branos, la llegada d’esta especie al Cantábricu fíxose más frecuente, y los científicos nun descarten que’l fenómenu pueda intensificase col cambéu climáticu.
Amás del IEO-CSIC y la Universidá d’Uviéu, coordinadores de PHYSALIA, nel proyectu tamién participen la Universidá de Les Palmes de Gran Canaria, l’Institutu de Ciencies Marines d’Andalucía (ICMAN-CSIC), el SOCIB (Sistema d’Observación y Predicción Costero de les Illes Balears) y collaboradores internacionales como la Pontificia Universidá Católica de Valparaísu (Chile), el Joint Research Center (JRC) y el Bermuda Institute of Ocean Science–Arizona State University (EUA).
Esta rede de trabayu va facer posible esperimentos n’otres rexones del planeta, incluyendo agues abiertes del Atlánticu y del Pacíficu, onde les carabeles portugueses son abondoses.
Susana Sela
This work is licensed under a Creative Commons Attribution 4.0 International License.
