Cientos de comentarios critiquen la obra del ‘mirador’ de Saliencia “Ye horrible, mírese como se mire” “Too destinao al turismu y la degradación de la naturaleza”, “Cómo poner una mierda nun llugar y trincar toos la mitá de la inversión y que nun s’entere nin dios”
Unanimidá dafechu nes opiniones de los asturianos no que cinca al nuevu mirador de Saliencia, una obra d’arquitectura mastodóntica llantada nun paisaxe que tendría de tar protexíu, un llazu d’hormigón y fierro a 1.700 metros d’altor pa esfrute de domingueros y turistes.
Les crítiques nes redes ciéntrense en tres cuestiones: ye horrendo, ta pensao pa turistes pasando perriba los intereses d’Asturies y ye una esculpia más pa desviar perres públiques a bolsos privaos. Los comentarios son mui duros: “la mierda pinchá nun palu”, “El que dexare ehí esa mierda, que pase a recoyela, la basoria nun se tira en monte”, “El que permitió eso tenía que tar presu”, “Con esi inventu chatarreru namás pa turistes tresnochaos y totalmente fuera de contestu abredse un ciclu de mamarrachaes que fadrán d’esi parque el faeme rir. Si nun saben en que gastar los impuestos lo que meyor faen ye tirase al vacíu dende esa chapuza” son dalgunos de los comentarios que puen lleese na noticia que La Nueva España espubliza col tema. Tamién se destaca en tonu de coña cuestiones comu que tenga QRs con información, pero nun haiga cobertura, o que seya aptu pa persones con movilidá reducida pero que nun tengan como llegar hasta allá “Mamía qué tonteríes hai que lleer. Pa persones con movilidá reducida y cómo lleguen? Y tamién pa xeología con QR pero nun hai interné pa lleelo. ¡Ye que ye de traca!”.
D’ente tolos comentarios destacamos un polo completu: “Pocu a pocu, les Conseyeríes de Mediu Ambiente y Turismu del Principado tán faciendo d’Asturies el mayor atentau ecolóxicu que pueda imaxinase. Siguen fomentando y aumentando esi turismu depredaor. Entamaron va años y un casu claru ye’l Sella onde diariamente cientos de piragues y turistes en masa arrasen ríu, vegues y praos espardiendo basoria (…) Lluéu tocó Covadonga y los Picos, convirtiendo nun parque temáticu un paraxe natural únicu nel mundiu. Depués tocó’l funicular de Bulnes, agora Somieu, llueu cualquier otru llugar significativu. Nun entienden el significau del entornu natural nel que viven. Quieren qu’Asturies sea poseyía poles mases, poles perres, que queden en manes d’unos pocos insensibles a la natura. Tan matando a la pita de los güevos d’oru, agora quieren facer un caldín… y ganar más perres perriba tou. ¡Malditos FDLGP!”.
Llucía F. Marqués
This work is licensed under a Creative Commons Attribution 4.0 International License.
