L’actu valió comu llamada d’atención previa al manifestamientu que tendrá llugar el domingu 17 d’Agostu pa pidir el fin de les corríes de toros en Xixón
Pancartes contra’l maltratu animal y semeyes de gües y caballos protagonizaron l’actu cellebráu na Plaza’l Parchís pa desixir que s’espulse de la ciudá y del país el xabaz y mui español vezu de la tauromaquia.
Cuando n’avientu del 2021 se retiró a la empresa Circuitos Taurinos el permisu d’usu de la Plaza Toros de Xixón ya s’avisó de que se taba faciendo en falso, nun se prohibien los toros, comu queríen poner de medaya, sinón qu’a cencielles se pausaba la so cellebración gracies a un tecnicismu. La llexislación española torga prohibir les corríes de toros, por ser considerao nel artículu 46 de la Constitución que la tauromaquia ye “padremoñu cultural d’España dignu d’especial protección”.
Sicasí, d’haber voluntá l’espaciu podría ocupase con otres actividaes, acutando l’usu de la plaza de manera que nun tuviere llibre pa la empresa taurina. L’apueste de l’alcaldesa de Xixón, la forista Carmen Moriyon, polos toros foi la que devolvió definitivamente les corríes a Xixón, una cellebración ayena, cruel, tresnochada y que Xixón refugó con manifestamientos dende l’entamu, siendo destacable’l del 15 d’agostu de 1914, día grande de les fiestes de Begoña, delantre de la plaza d’El Bibio. Asigún la prensa, asistieron más de cuatro mil persones (Xixón tinía unos 55.000 habitantes), ocupando la cabecera, ente otros, el rector de la Universidá d’Uviéu, Aniceto Sela.
Dientro d’esa tradición antitaurina el prósimu domingu 17 d’agostu tendrá llugar en Xixón otru multitudinariu manifestamientu contra la recuperación d’esta bárbara costume española na ciudá.
Llucía F. Marqués
This work is licensed under a Creative Commons Attribution 4.0 International License.
