La reciente autorización pa la istalación 148 contenedores de bateríes d’altu riesgu n’Uviéu abre la campaña contra los parques de bateries “esta actuación forma parte d’un procesu más ampliu de recolonización industrial d’Asturies, que repite l’esquema históricu del espoliu: primero fueron el carbón y l’aceru; agora, la enerxía y el paisaxe.”
El Principado, cola so avezada falta de tresparencia, nun fae públicu’l plan completu d’istalación de parques de bateríes n’Asturies, sinón que va dexando pingar pocu a pocu autorizaciones y proyeutos. Por agora, los parques de bateríes anunciaos afeuten a 24 conceyos, siendo de perestremaos grandores, dende los d’un contenedor d’almacenamientu, a instalaciones qu’inclúin hasta 320 contenedores o comu la recién anunciada n‘Uviéu, con na menos que 148 bateríes que s’allugarán a menos de 150 metros de llugares habitaos.
L’asoleyamientu d’esti caberu proyeutu ye’l puntu d’arranque de la campaña d’Andecha Astur, que denuncien non solo los ellevaos riesgos tósicos y de seguranza qu’impliquen estes instalaciones, sinón l’ausencia de participación ciudadana nel procesu, sorrayando la falta de soberanía de los asturianos a la de decidir que pasa na so propia casa “Esti ye un casu más de lo que supón la mal llamada ‘transición enerxética’ impuesta dende Madrid: una estratexa al serviciu de grandes corporaciones, que convierte Asturies nun apéndiz industrial y nun territoriu de sacrificiu”declaren. Y ye que estos contenedores d’enerxía nun tan destinaos a favorecer l’autoconsumu de lletricidá nin la soberanía enerxética, sinón pa garantizar el negociu de les empreses que controlen los macroparques eólicos y solares del Estáu. “La enerxía que se va almacenar nun ye pa les families asturianes, nin pa la pequeña industria, nin pal texíu llocal, sinón pa ser vendío al mejor postor nel mercáu estatal o europeu… los asturianos vamos carecer los daños y los riesgos ensin beneficios sociales nin económicos reales pal país”.
Pa Andecha Astur ta nidio que, si nun hai alderique públicu nos conceyos afeutaos nin información tresparente de les consecuencies y beneficios ye a cencielles porque hai muncho de les primeres y res de los segundos y acusen de complicidá nel procesu a les instituciones asturianes.
Por tou ello reclamen l’anulación d’estes autorizaciones y que s’abra un procesu d’información pública, participación vecinal y evaluación independiente, reafitándose nel so apueste por “una transición enerxética asturiana, democrática, descentralizada, ecolóxica y popular, que protexa’l territoriu, xenerando beneficios pa quien vive nél, y non pa quien vien a estrayelu”.
Llucía F. Marqués
This work is licensed under a Creative Commons Attribution 4.0 International License.
